ٹیکنالوجی
چیٹ ختم، اے آئی ایجنٹس کا دور شروع؟ اوپن اے آئی چیٹ جی پی ٹی میں بڑی تبدیلی لانے کی تیاری میں
مصنوعی ذہانت کی دنیا میں تیزی سے ابھرتی ہوئی کمپنی اوپن اے آئی مبینہ طور پر چیٹ جی پی ٹی میں اپنی تاریخ کی سب سے بڑی تبدیلی متعارف کرانے کی تیاری کر رہی ہے، جس کا مقصد پلیٹ فارم کو ایک عام چیٹ بوٹ سے مکمل اے آئی پروڈکٹیویٹی پلیٹ فارم میں تبدیل کرنا ہے۔
فنانشل ٹائمز کی ایک رپورٹ کے مطابق آنے والے ہفتوں میں چیٹ جی پی ٹی کا نیا ڈیزائن متعارف کرایا جا سکتا ہے، جس میں روایتی سوال و جواب کے نظام کے بجائے اے آئی ایجنٹس اور کوڈنگ ٹولز کو زیادہ اہمیت دی جائے گی۔
رپورٹ میں دعویٰ کیا گیا ہے کہ اوپن اے آئی کے اندر یہ سوچ مضبوط ہو رہی ہے کہ مستقبل صرف چیٹ بوٹس کا نہیں بلکہ ایسے خودکار اے آئی ایجنٹس کا ہے جو صارفین کی جانب سے مختلف کام انجام دے سکیں، ورک فلو خودکار بنا سکیں اور پیچیدہ امور کو سنبھال سکیں۔
اسی حکمت عملی کے تحت اوپن اے آئی اپنے کوڈنگ پلیٹ فارم “کوڈیکس” کو بھی نمایاں مقام دینے جا رہا ہے۔ یہ ٹول صارفین کو کوڈ لکھنے، سمجھنے اور سافٹ ویئر ڈویلپمنٹ کے مختلف مراحل میں مدد فراہم کرتا ہے۔
رپورٹ کے مطابق کمپنی ایک ایسے “سپر ایپ” ماڈل پر بھی کام کر رہی ہے جس میں اے آئی ایجنٹس، کوڈنگ فیچرز اور دیگر پیداواری ٹولز کو ایک ہی پلیٹ فارم پر یکجا کر دیا جائے گا، تاکہ صارفین ویب اور موبائل دونوں پر مختلف کام ایک ہی جگہ انجام دے سکیں۔
ماہرین کا کہنا ہے کہ یہ تبدیلی اوپن اے آئی کی آمدنی بڑھانے اور مستقبل میں ممکنہ پبلک آفرنگ کے اہداف سے بھی جڑی ہوئی ہے۔ مصنوعی ذہانت کی صنعت میں بڑھتے ہوئے مقابلے کے باعث کمپنیاں ایسے فیچرز پر توجہ دے رہی ہیں جو زیادہ آمدنی پیدا کر سکیں۔
رپورٹ میں یہ بھی بتایا گیا ہے کہ چیٹ جی پی ٹی میں اشتہارات متعارف کرانے اور نئے کاروباری ماڈلز اپنانے پر بھی غور کیا جا رہا ہے، جس سے ظاہر ہوتا ہے کہ اوپن اے آئی مستقبل میں چیٹ جی پی ٹی کو محض ایک چیٹ بوٹ نہیں بلکہ ایک مکمل ڈیجیٹل ورک پلیٹ فارم بنانا چاہتا ہے۔
