گوگل والٹ میں بڑی تبدیلی، خودکار بورڈنگ پاس اور نئے فیچرز متعارف

گوگل نے اینڈرائیڈ صارفین کیلئے گوگل والٹ کا نیا ڈیزائن متعارف کراتے ہوئے متعدد جدید سہولیات شامل کردی ہیں، جن کا مقصد صارفین کیلئے ادائیگیوں، سفری ٹکٹس اور دیگر ڈیجیٹل خدمات کو مزید آسان بنانا ہے۔

نئی اپڈیٹ کے تحت اب صارفین کو فلائٹ چیک اِن کے بعد بورڈنگ پاس خودکار طور پر گوگل والٹ میں موصول ہوجائے گا۔ اس کے علاوہ صارفین اب براہِ راست گوگل والٹ کے ذریعے مستقل سفر کرنے والے مسافروں کے خصوصی پروگرام بھی جوائن کرسکیں گے، جس کیلئے الگ سے ایئرلائن ایپ استعمال کرنے کی ضرورت نہیں ہوگی۔

گوگل نے اپنی سالانہ تقریب کے دوران کئی نئی اپڈیٹس کا اعلان کیا، جن میں نظام میں بہتری، مزید ممالک میں ڈیجیٹل شناختی سہولت اور ڈیجیٹل رسیدوں کی نئی سہولت شامل ہے تاکہ صارفین کو زیادہ مربوط اور آسان تجربہ فراہم کیا جاسکے۔

کمپنی نے ڈویلپرز کیلئے ایک خصوصی نظام بھی متعارف کرایا ہے جس کے ذریعے ڈیجیٹل رسیدیں براہِ راست گوگل والٹ میں بھیجی جاسکیں گی۔ گوگل کے مطابق اس سہولت سے صارفین کو خریداری کے بعد بہتر معلومات فراہم ہوں گی اور مدد سے متعلق مسائل میں کمی آئے گی۔

اس کے علاوہ گوگل پے میں مختلف ڈیوائسز کے ذریعے ادائیگی کی تصدیق کا نیا سیکیورٹی فیچر بھی شامل کیا گیا ہے، جو خاص طور پر کمپیوٹر پر کی جانے والی ٹرانزیکشنز کو زیادہ محفوظ بنائے گا۔ اس نظام کے تحت صارفین کو اپنے موبائل ڈیوائس پر ایک محفوظ نوٹیفکیشن یا کیو آر کوڈ موصول ہوگا، جس کے ذریعے وہ ادائیگی کی تصدیق کرسکیں گے۔

صارفین فنگر پرنٹ، چہرہ شناخت یا پن کوڈ کے ذریعے اپنے اینڈرائیڈ ڈیوائس پر ادائیگی منظور کرسکیں گے۔

گوگل والٹ کے نئے ڈیزائن میں ایک تیرتی ہوئی فوری رسائی بٹن بھی شامل کیا گیا ہے، جس کی مدد سے صارفین ایپ کے اہم فیچرز تک فوری رسائی حاصل کرسکیں گے۔