امریکا میں فٹبال کو “ساکر” کیوں کہا جاتا ہے؟ دلچسپ تاریخی راز سامنے آگیا

فٹبال دنیا کا سب سے مقبول کھیل سمجھا جاتا ہے، لیکن امریکا اور کینیڈا میں اسے آج بھی “ساکر” کے نام سے پکارا جاتا ہے۔ اس اصطلاح کی تاریخ 19ویں صدی کے انگلینڈ سے جا ملتی ہے۔

ماہرین کے مطابق 1863 میں انگلینڈ میں فٹبال ایسوسی ایشن کے قیام کے بعد اس کھیل کو “ایسوسی ایشن فٹبال” کہا جانے لگا تاکہ اسے “رگبی فٹبال” سے الگ پہچانا جا سکے۔

یونیورسٹی آف مشی گن کے پروفیسر اسٹیفن سیزمینسکی کے مطابق اس دور میں آکسفورڈ اور دیگر اشرافیہ تعلیمی اداروں کے طلبہ الفاظ کو مختصر کرکے ان کے آخر میں “-er” لگانے کا رجحان رکھتے تھے۔ اسی طرز پر “رگبی” سے “رگر” اور “ایسوسی ایشن” سے “ساکر” کی اصطلاح وجود میں آئی۔

کھیل کے مؤرخین کے مطابق 1880 اور 1890 کی دہائی میں انگلینڈ کے مختلف تعلیمی اداروں اور اسکول میگزینز میں “ساکر” کے استعمال کے شواہد موجود ہیں۔

بعد ازاں یہ اصطلاح امریکا، کینیڈا، آسٹریلیا، نیوزی لینڈ اور جنوبی افریقہ سمیت مختلف ممالک تک پھیل گئی۔ امریکا میں چونکہ “فٹبال” سے مراد امریکی فٹبال لیا جاتا ہے، اس لیے وہاں “ساکر” کا لفظ زیادہ عام ہوگیا۔

ماہرین کا کہنا ہے کہ “ساکر” کوئی امریکی ایجاد نہیں بلکہ انگریزی زبان سے نکلا ہوا لفظ ہے، جس کی جڑیں برطانیہ کی تعلیمی تاریخ میں پیوست ہیں۔