صحت
رات کو آئس کریم کھانے کی عادت دماغی دھند اور کمزوری کا سبب بن سکتی ہے، ماہرین صحت کی وارننگ
گرمیوں کی راتوں میں ٹھنڈی آئس کریم کھانا بہت سے لوگوں کی پسندیدہ عادت ہوتی ہے، لیکن ماہرین صحت کے مطابق یہ عادت اگلی صبح دماغی کمزوری، سستی اور توجہ کی کمی کا سبب بن سکتی ہے۔
طبی ماہرین کا کہنا ہے کہ رات کے وقت آئس کریم کھانے سے جسم میں شوگر کی سطح تیزی سے بڑھتی اور پھر اچانک کم ہو جاتی ہے، جس سے نیند کا قدرتی نظام متاثر ہوتا ہے۔ اس کیفیت کو سائنسی زبان میں “برین فوگ” کہا جاتا ہے، جس میں انسان صبح اٹھ کر ذہنی دھند، بھولنے کی عادت اور کم توانائی محسوس کرتا ہے۔
ماہرین کے مطابق آئس کریم میں چینی اور چکنائی کی مقدار زیادہ ہوتی ہے۔ جب سونے سے پہلے اسے کھایا جاتا ہے تو جسم کو اسے ہضم کرنے کے لیے اضافی محنت کرنا پڑتی ہے، جس کی وجہ سے نیند کے دوران ہاضمے کا نظام زیادہ سرگرم رہتا ہے۔
صحت کے ماہرین کا کہنا ہے کہ رات کے وقت دماغ قدرتی طور پر جسم سے فاضل مادوں اور دن بھر کی ذہنی تھکن کو صاف کرنے کے عمل میں مصروف ہوتا ہے، لیکن بھاری اور میٹھی غذا اس عمل میں رکاوٹ بن سکتی ہے۔
انہوں نے وضاحت کی کہ سونے سے قبل آئس کریم کھانے سے خون میں شوگر بڑھ جاتی ہے، جس کے نتیجے میں انسولین کی مقدار بھی زیادہ ہو جاتی ہے۔ بعد ازاں شوگر کا لیول اچانک کم ہونے سے نیند کے گہرے مراحل متاثر ہوتے ہیں اور انسان رات بھر بے سکونی محسوس کر سکتا ہے۔
ماہرین کے مطابق جسم میں میلاٹونین نامی ہارمون رات کے وقت نیند لانے میں اہم کردار ادا کرتا ہے، لیکن زیادہ چینی کھانے سے کورٹیسول نامی ہارمون کی سطح بڑھ سکتی ہے جو جسم کو بیدار اور متحرک رکھتا ہے۔ ان دونوں ہارمونز کے توازن میں خلل نیند کے معیار کو متاثر کر سکتا ہے۔
طبی ماہرین کا کہنا ہے کہ اگر کوئی شخص مسلسل رات گئے میٹھی اشیا کھانے کی عادت اپنائے رکھے تو اس سے نہ صرف نیند متاثر ہوتی ہے بلکہ وقت کے ساتھ وزن میں اضافہ، یادداشت کی کمزوری اور مزاج میں چڑچڑاپن بھی پیدا ہو سکتا ہے۔
ماہرین نے مشورہ دیا ہے کہ سونے سے کم از کم دو سے تین گھنٹے پہلے کھانا کھا لیا جائے اور رات کے وقت زیادہ چینی والی اشیا سے گریز کیا جائے۔
اگر رات کے وقت بھوک محسوس ہو تو آئس کریم یا دیگر میٹھی اشیا کے بجائے ہلکی پروٹین والی غذائیں جیسے دہی یا تھوڑی مقدار میں خشک میوہ جات استعمال کیے جا سکتے ہیں۔
ماہرین کے مطابق آئس کریم یا دیگر میٹھی اشیا کھانے کا بہتر وقت دن یا شام کا ابتدائی حصہ ہے، جب جسم کا ہاضمہ زیادہ فعال ہوتا ہے اور خوراک کو بہتر انداز میں استعمال کر سکتا ہے۔
صحت کے ماہرین کا کہنا ہے کہ اگر صبح اٹھتے وقت مسلسل تھکن، توجہ کی کمی، دماغی دھند یا میٹھی اشیا کی شدید خواہش محسوس ہو تو یہ اس بات کی علامت ہو سکتی ہے کہ رات کی خوراک آپ کی نیند اور دماغی کارکردگی کو متاثر کر رہی ہے۔
