صحت
ہر کھانے کے بعد 10 منٹ کی چہل قدمی پیٹ کی چربی کم کرنے میں مددگار، ماہرین
غذائی اور طبی ماہرین نے مشورہ دیا ہے کہ ہر کھانے کے بعد مختصر چہل قدمی کو روزمرہ معمول کا حصہ بنایا جائے کیونکہ یہ عادت پیٹ کی چربی کم کرنے اور مجموعی صحت بہتر بنانے میں اہم کردار ادا کر سکتی ہے۔
ماہرین کے مطابق پیٹ کے گرد جمع ہونے والی چربی نہ صرف موٹاپے کا باعث بنتی ہے بلکہ ذیابیطس، دل کی بیماریوں اور دیگر صحت کے مسائل کے خطرات میں بھی اضافہ کرتی ہے۔
تحقیقی رپورٹس کے مطابق کھانے کے بعد 10 سے 15 منٹ کی ہلکی یا درمیانی رفتار سے چہل قدمی کرنے سے خون میں شکر کی سطح اچانک نہیں بڑھتی، جس کے نتیجے میں جسم میں اضافی چربی ذخیرہ ہونے کا عمل سست پڑ جاتا ہے۔
طبی ماہرین کا کہنا ہے کہ کھانے کے بعد چہل قدمی ہاضمے کو بہتر بناتی ہے، گیس اور اپھارے میں کمی لاتی ہے، خون کی گردش کو بہتر کرتی ہے اور جسمانی میٹابولزم کو متحرک رکھتی ہے، جس سے چربی کم کرنے میں مدد ملتی ہے۔
ماہرین نے مشورہ دیا ہے کہ کھانے کے فوراً بعد سخت ورزش یا تیز رفتار واک سے گریز کیا جائے۔ بہتر نتائج کے لیے کھانے کے بعد 10 سے 15 منٹ انتظار کرنے کے بعد ہلکی چہل قدمی کی جائے۔
ان کے مطابق یہ عادت خاص طور پر ذیابیطس، پیٹ کی چربی، ہاضمے کے مسائل اور زیادہ تر بیٹھے رہنے والے طرزِ زندگی کے حامل افراد کے لیے مفید ثابت ہو سکتی ہے۔
ماہرین کا کہنا ہے کہ اگر اس عادت کے ساتھ متوازن غذا اور مناسب مقدار میں پانی کا استعمال بھی جاری رکھا جائے تو ابتدائی فوائد ایک سے دو ہفتوں میں جبکہ پیٹ کی چربی میں نمایاں کمی چار سے چھ ہفتوں میں محسوس کی جا سکتی ہے۔
نوٹ: یہ معلومات عمومی آگاہی کے لیے ہیں۔ کسی بھی بیماری کی تشخیص یا علاج کے لیے مستند ڈاکٹر سے مشورہ ضرور کریں۔
