پاکستان کو اپنی معاشی خودمختاری برقرار رکھتے ہوئے اصلاحات پر عمل کرنا ہوگا, امریکی ناظم الامور

امریکی ناظم الامور نٹیلی اے بیکر نے کہا ہے کہ پاکستان ایک آزاد ملک ہے اور اسے کسی بھی ملک کے قرضوں کے جال میں نہیں پھنسنا چاہئے۔ انہوں نے کہا کہ پاکستان کو اپنے نجکاری پروگرام پر بھرپور عمل کرنا چاہیے تاکہ ملکی معیشت مضبوط اور پائیدار ہو۔

نٹیلی بیکر نے مزید کہا کہ آئی ایم ایف کے اصلاحاتی پروگرام پر مکمل عملدرآمد سے ہی پاکستان کی اقتصادی حکمت عملی کامیاب ہوگی، اور ورلڈ بینک بھی پاکستان کے ساتھ مؤثر انداز میں تعاون کر رہا ہے۔

ایوان صدر میں صحافیوں سے غیر رسمی گفتگو کرتے ہوئے انہوں نے کہا کہ پاکستان کے ساتھ امریکہ کا اقتصادی تعاون بہت اچھا ہے اور امریکہ پاکستان کی خودمختاری کو انتہائی اہمیت دیتا ہے۔

چین کے ساتھ تعلقات کے بارے میں سوال پر انہوں نے کہا کہ پاکستان ایک آزاد اور خودمختار ملک ہے اور کسی بھی ملک کے ساتھ تعلقات رکھ سکتا ہے، لیکن اسے اپنی معاشی خودمختاری کا محتاط انداز میں تحفظ کرنا ہوگا۔

انہوں نے واشنگٹن میں صدر ڈونلڈ ٹرمپ کے پاکستان کے متوقع دورے کا بھی تذکرہ کیا اور کہا کہ صدر ٹرمپ امن کے داعی ہیں۔