لاہور سے جدہ جانے والی پی آئی اے پرواز کی ہنگامی لینڈنگ، تمام مسافر محفوظ

لاہور سے جدہ جانے والی پی آئی اے کی پرواز پی کے 859 کو ایک ہنگامی صورتحال کا سامنا اُس وقت کرنا پڑا جب دورانِ پرواز جہاز سے ایک پرندہ ٹکرا گیا۔

ذرائع کے مطابق، پرندہ طیارے کی ونڈ اسکرین سے ٹکرایا جس سے شیشہ شدید متاثر ہوا۔ پائلٹ نے حاضر دماغی کا مظاہرہ کرتے ہوئے فوری طور پر طیارے کو کراچی کے جناح انٹرنیشنل ایئرپورٹ کی طرف موڑ لیا۔

پرواز میں 344 مسافر سوار تھے، جن میں بڑی تعداد میں عمرہ زائرین شامل تھے۔ خوش قسمتی سے تمام مسافر بحفاظت رہے۔ انتظامیہ نے انہیں فوری طور پر ہوٹل منتقل کر دیا۔

ذرائع کے مطابق، طیارے کی مرمت کا عمل جاری ہے جو تقریباً 12 گھنٹے میں مکمل ہونے کی توقع ہے۔ مرمت اور تکنیکی جانچ مکمل ہونے کے بعد پرواز کو آج رات دوبارہ جدہ کے لیے روانہ کیا جائے گا۔

سول ایوی ایشن اور پی آئی اے حکام نے پائلٹ اور عملے کی بروقت کارروائی اور پیشہ ورانہ مہارت کو سراہا ہے، جس سے ممکنہ بڑے حادثے سے بچاؤ ممکن ہوا۔