بجٹ سے متعلق صوبوں کے ساتھ کئی ہفتوں سے مشاورت جاری ہے، وزیر اعظم شہباز شریف

وزیراعظم شہباز شریف نے کہا ہے کہ وفاقی حکومت بجٹ کی تیاری کے سلسلے میں صوبوں کے ساتھ کئی ہفتوں سے مسلسل مشاورت کر رہی ہے اور زیادہ سے زیادہ وسائل پیدا کرنا حکومت کی اولین ترجیح ہے۔

قومی اقتصادی کونسل کے اجلاس سے خطاب کرتے ہوئے وزیراعظم نے کہا کہ دفاعی ضروریات اور دہشت گردی کے خلاف جاری جنگ کے لیے وسائل کی فراہمی ناگزیر ہے۔ انہوں نے کہا کہ پوری قوم، خصوصاً خیبرپختونخوا اور بلوچستان کے عوام، دہشت گردی کے خلاف بے مثال قربانیاں دے رہے ہیں۔

وزیراعظم کا کہنا تھا کہ خطے کی موجودہ صورتحال کے باعث عالمی منڈی میں تیل کی قیمتوں میں نمایاں اضافہ دیکھنے میں آیا، جبکہ دنیا کے کئی ممالک میں ایندھن کی قلت اور پیٹرول پمپوں پر طویل قطاریں بھی دیکھنے میں آئیں۔ تاہم بروقت حکومتی اقدامات اور صوبوں کے تعاون سے پاکستان میں عوام کو پیٹرول کی مسلسل فراہمی یقینی بنائی گئی۔

انہوں نے بتایا کہ حکومت نے تیل کی قیمتوں کی مد میں عوام کو 128 ارب روپے کا ریلیف فراہم کیا، جس سے مہنگائی کے اثرات کو کم کرنے میں مدد ملی۔

شہباز شریف نے کہا کہ آج پاکستان کی معیشت میکرو سطح پر استحکام کی جانب گامزن ہے، تاہم روزگار کے مواقع بڑھانا، برآمدات میں اضافہ، پیداواری صلاحیت میں بہتری اور معاشی ترقی کا تسلسل برقرار رکھنا سب کی مشترکہ ذمہ داری ہے۔

وزیراعظم نے مزید کہا کہ مشکلات کے باوجود حکومت نے بین الاقوامی مالیاتی فنڈ (آئی ایم ایف) پروگرام پر عملدرآمد جاری رکھا، جس کے نتیجے میں معاشی استحکام حاصل کرنے میں مدد ملی۔

قومی اقتصادی کونسل نے اجلاس کے دوران آئندہ مالی سال کے لیے اہم معاشی اہداف کی بھی منظوری دے دی۔