آئی ایم ایف کا حکومت سے پیٹرولیم سبسڈی ختم کرنے کا مطالبہ، بجٹ مشاورت شروع

پاکستان اور عالمی مالیاتی فنڈ کے درمیان آئندہ مالی سال کے وفاقی بجٹ کے اہم اہداف طے کرنے کے لیے ابتدائی ورچوئل مشاورت شروع ہوگئی ہے۔

ذرائع وزارتِ خزانہ کے مطابق آئی ایم ایف نے حکومت کو تجویز دی ہے کہ پیٹرولیم مصنوعات پر سبسڈی جاری نہ رکھی جائے تاکہ مالی بوجھ میں کمی لائی جا سکے۔ ادارے نے اس بات پر زور دیا کہ توانائی اور ایندھن کی قیمتوں میں بروقت ایڈجسٹمنٹ ضروری ہے۔

مزید برآں، آئی ایم ایف نے بجلی اور توانائی کے نرخوں سے متعلق ریگولیٹری اداروں کی تجاویز پر فوری عمل درآمد کی بھی سفارش کی ہے۔ آئندہ بجٹ میں ٹیکس استثنیٰ، رعایتوں اور چھوٹ میں کمی کی تجویز بھی زیر غور ہے۔

ذرائع کے مطابق ٹیکس نیٹ میں توسیع، حکومتی اخراجات میں کمی اور ٹیکس ٹو جی ڈی پی شرح میں سالانہ کم از کم ایک فیصد اضافہ بھی اہم اہداف میں شامل ہیں۔

یہ اقدامات پاکستان کی معیشت کو مستحکم کرنے اور بڑھتے ہوئے قرضوں کے بوجھ کو کم کرنے کے لیے کیے جا رہے ہیں۔