وزیر اعظم کی ہدایت، مون سون نقصانات سے بچنے کیلئے فوری تیاری کا فیصلہ

وزیر اعظم شہباز شریف نے آئندہ برس مون سون کے دوران کسی بھی ممکنہ جانی و مالی نقصان سے بچنے کے لیے فوری طور پر جامع حکمت عملی تشکیل دینے کی ہدایت کردی ہے۔ وزیراعظم آفس کے میڈیا ونگ کے مطابق شہباز شریف کی زیر صدارت موسمیاتی تبدیلیوں کے مضر اثرات سے متعلق حکومتی حکمت عملی کا جائزہ اجلاس منعقد ہوا۔

اجلاس میں وزیراعظم نے واضح کیا کہ وزارت موسمیاتی تبدیلی، وزارت منصوبہ بندی اور نیشنل ڈیزاسٹر مینجمنٹ اتھارٹی (این ڈی ایم اے) صوبائی حکومتوں کے ساتھ مل کر مربوط منصوبہ بندی کو یقینی بنائیں۔ انہوں نے ہدایت کی کہ آئندہ برس مون سون کے ممکنہ خطرات سے نمٹنے کیلئے ابھی سے تیاریوں کا آغاز کیا جائے۔

وزیراعظم شہباز شریف نے ملکی سطح پر پانی کے مؤثر انتظام کے لیے نیشنل واٹر کونسل کا اجلاس بلانے کی تیاری کرنے کا بھی حکم دیا، جبکہ پیش کردہ قلیل مدتی منصوبے پر فوری عملدرآمد کی ہدایت کی۔

انہوں نے کہا کہ پاکستان کا موسمیاتی تبدیلی میں کردار نہ ہونے کے برابر ہے لیکن یہ بدترین اثرات کی زد میں ہے۔ “ایک ترقی پذیر ملک ہونے کے ناطے ہمیں ہر تیسرے سال جی ڈی پی کا بڑا حصہ موسمیاتی تبدیلی کے نقصانات سے نمٹنے پر خرچ کرنا پڑتا ہے، جس سے قیمتی وسائل ترقیاتی کاموں کی بجائے حفاظتی اقدامات پر استعمال ہوجاتے ہیں۔”

اجلاس میں وفاقی وزرا احسن اقبال، احد خان چیمہ، محمد اورنگزیب، ڈاکٹر مصدق ملک، عطا اللہ تارڑ سمیت اعلیٰ حکام نے شرکت کی، جبکہ شرکا کو عالمی موسمیاتی اشاریوں اور مختصر، وسط اور طویل مدتی منصوبوں پر بریفنگ دی گئی۔ وزیراعظم نے قلیل مدتی منصوبے کی منظوری دیتے ہوئے فوری عملدرآمد کا حکم دیا۔