عطا تارڑ کی خیبر پختونخوا حکومت پر گورننس اور کابینہ میں اضافے کے حوالے سے تنقید

وفاقی وزیرِ اطلاعات عطا اللّٰہ تارڑ نے خیبر پختونخوا حکومت پر شدید تنقید کرتے ہوئے کہا ہے کہ صوبے میں مؤثر گورننس کا فقدان ہے اور عوامی وسائل کو فلاحی منصوبوں کے بجائے سیاسی مقاصد کے لیے استعمال کیا جا رہا ہے۔

ایک بیان میں عطا تارڑ نے کہا کہ صوبے میں کرپشن اور بدانتظامی خطرناک حد تک بڑھ چکی ہے۔ انہوں نے صوبائی کابینہ کے حجم میں حالیہ اضافے پر بھی سوال اٹھاتے ہوئے کہا کہ وزراء اور مشیروں کے انتخاب میں نااہلی کے سوا کوئی معیار نظر نہیں آتا۔

وفاقی وزیر نے سوال کیا کہ کیا کابینہ کی تعداد بڑھانے سے واقعی گورننس بہتر ہو جائے گی؟ انہوں نے کہا کہ 12 سال سے زائد عرصہ اقتدار میں رہنے کے باوجود خیبر پختونخوا حکومت بہتر طرزِ حکمرانی فراہم کرنے میں ناکام رہی ہے۔

عطا تارڑ کے مطابق خیبر پختونخوا کے حالات اس سے پہلے کبھی اتنے خراب نہیں تھے اور صوبے کے عوام کمزور انتظامیہ اور ناقص فیصلوں کی وجہ سے مشکلات کا شکار ہیں۔