پاکستان نے امریکا اور ایران کو 47 سال بعد مذاکرات کی میز پر لایا، اسحاق ڈار

اسحاق ڈار نے دعویٰ کیا ہے کہ پاکستان نے امریکا اور ایران کو 47 سال بعد مذاکرات کی میز پر بٹھانے میں اہم کردار ادا کیا۔

اسلام آباد میں پاکستان علماء کونسل کے زیرِ اہتمام چھٹی بین الاقوامی پیغامِ اسلام کانفرنس سے خطاب کرتے ہوئے اسحاق ڈار نے کہا کہ پاکستان نے دونوں ممالک کو مذاکرات کے لیے آمادہ کیا۔

انہوں نے بتایا کہ ایران کا مؤقف تھا کہ ماضی میں امریکا اور ایران کے درمیان صرف بالواسطہ مذاکرات ہوتے رہے، تاہم پاکستان کی ثالثی میں اسلام آباد میں دونوں ممالک کے درمیان 21 گھنٹے طویل مذاکرات ہوئے۔

اسحاق ڈار نے کہا کہ پاکستان خطے میں امن کے قیام کے لیے مسلسل سفارتی کوششیں کر رہا ہے۔ انہوں نے مزید کہا کہ پاکستان اور سعودی عرب کے درمیان دفاعی تعاون ایک اہم سنگِ میل ہے اور حرمین شریفین کے تحفظ کے لیے پاکستانی قوم ہر قربانی دینے کو تیار ہے۔

انہوں نے بھارت پر بھی تنقید کرتے ہوئے کہا کہ بھارت نے پہلگام واقعے کا بے بنیاد الزام لگا کر پاکستان پر حملہ کیا، تاہم پاکستانی قوم نے معرکۂ حق میں مثالی اتحاد کا مظاہرہ کیا۔

فلسطین کی صورتحال پر گفتگو کرتے ہوئے نائب وزیرِ اعظم نے کہا کہ جنگ بندی کے بعد اگرچہ خونریزی مکمل طور پر نہیں رکی، تاہم اس میں واضح کمی ضرور آئی ہے۔