روس نے کینسر کے علاج کے لیے جدید ویکسین تیار کر لی، مفت فراہم کی جائے گی

روس نے کینسر کے علاج کے لیے اپنی ویکسین تیار کرنے کا اعلان کیا ہے، جو 2025 سے مریضوں کو مفت فراہم کی جائے گی۔ ریڈیالوجی میڈیکل ریسرچ سینٹر کے ڈائریکٹر جنرل، آندرے کپری نے ریڈیو روسیہ کو بتایا کہ یہ ویکسین ابتدائی آزمائشوں میں کامیاب رہی ہے، جیسا کہ روسی خبر ایجنسی نے رپورٹ کیا۔

ویکسین نے ابتدائی تجربات میں ٹیومر کی افزائش کو روکنے اور اس کے پھیلاؤ کو کم کرنے میں غیر معمولی نتائج دیے ہیں۔ مصنوعی ذہانت کی مدد سے اس ویکسین کی تیاری کے عمل کو تیز کیا گیا ہے، جو صرف ایک گھنٹے میں شخصی ضرورت کے مطابق تیار کی جا سکتی ہے۔

گامالیہ نیشنل ریسرچ سینٹر کے ڈائریکٹر، الیگزینڈر گنس برگ نے تصدیق کی کہ یہ ویکسین جلد عوامی استعمال کے لیے دستیاب ہوگی اور کینسر کے علاج میں انقلاب برپا کرے گی۔

یہ ویکسین جسم کے مدافعتی نظام کو مضبوط کرتی ہے، ابتدائی مرحلے کے کینسر کو ختم کرتی ہے اور دوبارہ ہونے سے بچاتی ہے۔