کاؤنٹر ٹیررازم سینٹر کے سابق سربراہ کا ٹرمپ سے بڑا مطالبہ سامنے آگیا

امریکی صدر ڈونلڈ ٹرمپ کے سابق معاون اور کاؤنٹر ٹیررازم سینٹر کے سابق سربراہ جو کینٹ نے مشرقِ وسطیٰ کی صورتحال پر ایک اہم بیان دیتے ہوئے امریکا سے اسرائیل کے لیے فوجی اور انٹیلی جنس امداد فوری طور پر بند کرنے کا مطالبہ کیا ہے۔

سوشل میڈیا پلیٹ فارم “ایکس” پر جاری اپنے بیان میں جو کینٹ کا کہنا تھا کہ ایران کے ساتھ ہونے والی مفاہمتی یادداشتوں اور سفارتی کوششوں کے تحفظ کے لیے امریکا کو اپنی موجودہ پالیسی پر نظرثانی کرنا ہوگی۔

انہوں نے دعویٰ کیا کہ اسرائیل نے ایران کے ساتھ ہونے والی بعض اہم پیش رفت اور معاہدوں کو ناکام بنانے کی کوشش کی ہے، اس لیے واشنگٹن کو اپنے اتحادیوں کے حوالے سے پالیسی کا ازسرِ نو جائزہ لینا چاہیے۔

جو کینٹ نے مزید کہا کہ امریکا کو اسرائیل کے لیے تمام فوجی اور انٹیلی جنس تعاون روک دینا چاہیے اور خلیجی ممالک میں تعینات امریکی اہلکاروں کو واپس بلانے پر بھی غور کرنا چاہیے۔

ان کا کہنا تھا کہ ایران کی پہنچ میں آنے والے امریکی فوجی اڈوں کو خالی کرنا اور خطے میں کشیدگی کم کرنے کے اقدامات کرنا وقت کی اہم ضرورت ہے۔

سابق سربراہ کاؤنٹر ٹیررازم سینٹر کے مطابق امریکا کو مشرقِ وسطیٰ میں کسی نئی اور بڑی جنگ سے بچنے کے لیے محتاط اور دور اندیش پالیسی اپنانی چاہیے تاکہ خطے میں استحکام اور سفارتی حل کی راہ ہموار ہو سکے۔