سیاست
سپریم جوڈیشل کونسل نے چیف جسٹس یحییٰ آفریدی کے خلاف تمام شکایات خارج کر دیں
سپریم جوڈیشل کونسل کے حالیہ اجلاس میں چیف جسٹس پاکستان کے خلاف دائر کی گئی پانچ شکایات کو متفقہ طور پر خارج کر دیا گیا۔ اجلاس کے بعد جاری اعلامیے میں فیصلے کی تفصیلات بھی عوام کے سامنے پیش کی گئیں۔
اعلامیے کے مطابق پہلی شکایت پشاور ہائی کورٹ کے وکیل صبغت اللہ شاہ کی جانب سے 2016 میں دائر کی گئی تھی، جب یحییٰ آفریدی پشاور ہائی کورٹ کے جج تھے۔ سپریم جوڈیشل کونسل نے 14 مئی کے اجلاس میں اس شکایت کو ناقابلِ کارروائی قرار دیتے ہوئے مسترد کر دیا۔
دوسری شکایت کراچی کے شہری امجد حسین درانی نے دائر کی، جس میں مؤقف اختیار کیا گیا تھا کہ سپریم کورٹ میں ایک مقدمہ بغیر سماعت کے خارج کیا گیا، جو مبینہ طور پر مس کنڈکٹ کے زمرے میں آتا ہے۔ کونسل نے اس شکایت کو بھی متفقہ طور پر خارج کر دیا۔
تیسری شکایت کراچی کے رہائشی کامران خان کی جانب سے جمع کرائی گئی، جس میں الزام لگایا گیا کہ ان کی درخواست کو سماعت کا موقع دیے بغیر مسترد کیا گیا۔ اعلامیے کے مطابق اس شکایت کو بھی ناقابلِ کارروائی قرار دے دیا گیا۔
چوتھی شکایت وہاڑی کے رہائشی محمد مسعود نے دائر کی تھی، جس میں مارچ 2023 کے ایک دیوانی مقدمے میں مبینہ طور پر قانون کے خلاف فیصلہ دینے کا الزام عائد کیا گیا تھا۔ سپریم جوڈیشل کونسل نے اس شکایت کو بھی خارج کر دیا۔
پانچویں شکایت لاہور ہائی کورٹ کے وکیل امجد محمود کی جانب سے دائر کی گئی، جس میں الزام تھا کہ 2024 میں ایک وکیل کے سپریم کورٹ میں داخلے پر پابندی لگائی گئی۔ کونسل نے اس شکایت کو بھی متفقہ طور پر مسترد کر دیا۔
اعلامیے کے مطابق تمام شکایات کا تفصیلی جائزہ لینے کے بعد سپریم جوڈیشل کونسل نے متفقہ فیصلہ سناتے ہوئے انہیں ناقابلِ کارروائی قرار دے کر نمٹا دیا ہے۔
