امریکا نے ایران کے میزائل حملے کے دعوے کو بے بنیاد قرار دے دیا، آبنائے ہرمز میں کشیدگی برقرار

ایران کی جانب سے امریکی بحری جہاز پر میزائل حملے کے دعوے پر امریکہ نے سخت ردعمل دیتے ہوئے اسے من گھڑت اور بے بنیاد قرار دیا ہے۔

میڈیا رپورٹس کے مطابق آبنائے ہرمز کے حساس سمندری علاقے میں ایران اور امریکہ کے درمیان بیانیہ جنگ شدت اختیار کر گئی ہے۔ ایرانی سرکاری میڈیا نے امریکی بحریہ پر میزائل حملے کے دعوے کیے، تاہم واشنگٹن نے ان الزامات کو سختی سے مسترد کر دیا۔

امریکی حکام کے مطابق ایران کی پاسدارانِ انقلاب کی جانب سے جاری کردہ رپورٹ مکمل طور پر من گھڑت ہے۔ ایک امریکی اہلکار نے واضح کیا کہ کسی بھی امریکی بحری جہاز کو نشانہ نہیں بنایا گیا اور نہ ہی ایسا کوئی واقعہ پیش آیا۔

اسی تناظر میں امریکی مرکزی کمان نے بھی اپنے بیان میں ایرانی دعوؤں کی تردید کرتے ہوئے کہا کہ کوئی امریکی بحری جہاز نشانہ نہیں بنا۔ یہ بیان سماجی رابطوں کے ایک پلیٹ فارم پر جاری کیا گیا، جس میں ان خبروں کو بے بنیاد قرار دیا گیا۔

دوسری جانب ایرانی خبر رساں ادارے نے ایک عسکری بیان کے حوالے سے دعویٰ کیا کہ ایرانی بحریہ نے بروقت وارننگ جاری کرتے ہوئے مبینہ طور پر امریکی اور اسرائیلی جنگی جہازوں کو آبنائے ہرمز میں داخل ہونے سے روک دیا۔

تجزیہ کاروں کے مطابق دونوں ممالک کے متضاد بیانات اس بات کی عکاسی کرتے ہیں کہ خطے میں صرف عسکری نہیں بلکہ اطلاعاتی محاذ پر بھی کشیدگی عروج پر ہے۔ آبنائے ہرمز، جو عالمی تیل کی ترسیل کا ایک اہم گزرگاہ ہے، کسی بھی کشیدگی کی صورت میں عالمی معیشت کو متاثر کر سکتی ہے۔

ماہرین کا کہنا ہے کہ اس نوعیت کے دعوے اور ان کی تردید خطے میں غیر یقینی صورتحال کو بڑھا سکتی ہے اور کسی بھی غلط فہمی کے نتیجے میں بڑے تصادم کا خطرہ بھی موجود رہتا ہے۔