فیلڈ مارشل عاصم منیر سے کاروباری برادری کی ملاقات، معیشت کی بہتری کے لیے تجاویز پیش

فیلڈ مارشل جنرل عاصم منیر سے ملک کی ممتاز کاروباری شخصیات نے ملاقات کی جس میں ملکی معیشت کی موجودہ صورتحال اور مستقبل کے چیلنجز پر تفصیلی گفتگو ہوئی۔

اس ملاقات کی قیادت سابق نگراں وفاقی وزیر گوہر اعجاز نے کی جبکہ ان کے ہمراہ اے پی ٹی ایم اے کے چیئرمین کامران ارشد، ایس ایم تنویر، ایف پی سی سی آئی اور لاہور چیمبر آف کامرس کے صدور بھی شریک تھے۔

گوہر اعجاز نے اس موقع پر فیلڈ مارشل کو آگاہ کیا کہ کاروباری برادری حکومت کی معاشی پالیسیوں کی حمایت کر رہی ہے، تاہم وہ چاہتی ہے کہ مزید کاروباری آسانیاں پیدا کی جائیں۔ انہوں نے زور دیا کہ شرح سود کو مہنگائی کے تناسب سے کم کیا جائے تاکہ صنعتی سرگرمیوں میں تیزی آ سکے۔

گوہر اعجاز نے وفاقی بجٹ سے متعلق تحفظات بھی بیان کیے اور حکومت سے مطالبہ کیا کہ اپنے وعدے پورے کرے تاکہ برآمدی معیشت مستحکم ہو سکے۔ کپاس کی صنعت اور زراعت کے فروغ کے لیے بھی خصوصی اقدامات کی سفارش کی گئی۔

ملاقات میں اس امر پر بھی زور دیا گیا کہ حکومت معاشی اصلاحات کے عمل کو تیز کرے تاکہ غیر یقینی صورتحال سے نکل کر ترقی کی راہ پر گامزن ہوا جا سکے۔