ایران کے سپریم لیڈر کا ڈونلڈ ٹرمپ پر سخت حملہ، فرعون اور نمرود سے تشبیہ

ایران کے سپریم لیڈر آیت اللہ علی خامنہ ای نے امریکی صدر ڈونلڈ ٹرمپ پر شدید تنقید کرتے ہوئے انہیں فرعون، نمرود اور رضا شاہ جیسے تاریخ کے ظالم حکمرانوں سے تشبیہ دے دی ہے اور خبردار کیا ہے کہ ان کا انجام بھی ایسا ہی ہوگا۔

سوشل میڈیا پر جاری اپنے بیان میں آیت اللہ خامنہ ای نے کہا کہ غرور میں مبتلا ایک شخص خود کو دنیا کے فیصلے کرنے کا اہل سمجھنے لگتا ہے، مگر وہ یہ بھول جاتا ہے کہ تاریخ میں طاقت کے نشے میں مبتلا حکمرانوں کے ساتھ کیا ہوا۔

انہوں نے کہا کہ تاریخ اس بات کی گواہ ہے کہ ظلم، تکبر اور جبر پر قائم اقتدار زیادہ دیر تک قائم نہیں رہتا۔ طاقت کے عروج پر موجود حکمران خود کو ناقابلِ شکست سمجھتے ہیں، مگر بالآخر زوال ان کا مقدر بنتا ہے۔

یہ بیان ایسے وقت میں سامنے آیا ہے جب ایران اور امریکا کے درمیان کشیدگی ایک بار پھر شدت اختیار کر رہی ہے اور خطے میں اسرائیل کے کردار پر بھی سوالات اٹھ رہے ہیں۔

دوسری جانب ایران کے صدر مسعود پزشکیان نے امریکا اور اسرائیل پر ایران کے اندر بدامنی پھیلانے کا الزام عائد کیا۔ ان کا کہنا تھا کہ بیرونی طاقتیں سیاسی دباؤ، معاشی پابندیوں اور خفیہ کارروائیوں کے ذریعے ایران کو عدم استحکام کا شکار بنانے کی کوشش کر رہی ہیں۔

ایرانی صدر نے واضح کیا کہ ایران اپنی خودمختاری کے تحفظ کے لیے کسی بھی دباؤ کو قبول نہیں کرے گا اور بیرونی مداخلت خطے میں مزید کشیدگی کو جنم دے سکتی ہے۔

ایرانی قیادت کے ان بیانات سے واضح ہوتا ہے کہ تہران امریکا اور اسرائیل کے خلاف سخت مؤقف برقرار رکھے ہوئے ہے اور خود کو مغربی جارحیت کے خلاف مزاحمت کی علامت کے طور پر پیش کر رہا ہے۔