پی ٹی آئی بانی کا مقدمات کا سامنا کرنے کا اعلان، کسی ڈیل سے انکار

پی ٹی آئی بانی نے اعلان کیا ہے کہ وہ اپنے مقدمات میں کسی ڈیل کے بجائے انہی ججوں کے سامنے پیش ہوں گے۔ انہوں نے الزام لگایا کہ حکومت نے ان کی سزا یقینی بنانے کے لیے خاص جج تعینات کیے ہیں، لیکن وہ کسی بھی دباؤ کے سامنے جھکنے کو تیار نہیں۔

انہوں نے آرمی چیف کو کسی ڈیل کے لیے خط لکھنے کی خبروں کو مسترد کرتے ہوئے وضاحت کی کہ ان کا مقصد فوج پر عوام کے کم ہوتے اعتماد کی نشاندہی کرنا تھا۔ انہوں نے کہا کہ عوام اور فوج کے درمیان بڑھتا ہوا فاصلہ پاکستان کے استحکام کے لیے خطرہ بن سکتا ہے اور اسے ختم کرنا ضروری ہے۔

انہوں نے اسٹیبلشمنٹ کی پالیسیوں کو تنقید کا نشانہ بناتے ہوئے کہا کہ ان کی وجہ سے قوم اور فوج میں دوریاں پیدا ہو رہی ہیں۔ تاہم، انہوں نے فوج کی اہمیت پر زور دیتے ہوئے کہا کہ ملک کی بقا کے لیے عوام اور فوج کا متحد ہونا ضروری ہے۔

انہوں نے اعلان کیا کہ وہ اگلے ہفتے عوام کے نام ایک کھلا خط لکھیں گے، جس میں اسٹیبلشمنٹ اور چیف جسٹس سے اپیل کریں گے کہ وہ عوام کے ساتھ کھڑے ہوں، ظلم کا خاتمہ کریں اور قومی ہم آہنگی کے لیے اقدامات کریں۔