نیتن یاہو کا غزہ کے 70 فیصد علاقے پر قبضے کا حکم، خطے میں کشیدگی مزید بڑھنے کا خدشہ

اسرائیلی وزیراعظم بنیامین نیتن یاہو نے غزہ میں جاری فوجی کارروائیوں کو مزید وسعت دیتے ہوئے اسرائیلی فوج کو علاقے کے 70 فیصد حصے پر قبضہ یقینی بنانے کی ہدایت جاری کر دی ہے۔

انہوں نے یہ بیان مقبوضہ مغربی کنارے میں قائم ایک غیر قانونی اسرائیلی بستی میں پریس کانفرنس کے دوران دیا۔ نیتن یاہو کے مطابق اسرائیلی فوج پہلے ہی غزہ کے تقریباً 50 فیصد علاقے پر کنٹرول حاصل کر چکی تھی، جسے بعد ازاں 60 فیصد تک بڑھایا گیا، جبکہ اب فوج کو 70 فیصد علاقے پر قبضہ مضبوط بنانے کا حکم دیا گیا ہے۔

اس اعلان کے بعد خطے میں کشیدگی مزید بڑھنے کے خدشات پیدا ہو گئے ہیں۔ دوسری جانب غزہ کی بڑی آبادی پہلے ہی ساحلی پٹی کے ایک محدود حصے تک محدود ہو چکی ہے جہاں خوراک، صاف پانی اور طبی سہولیات کی شدید قلت کا سامنا ہے۔

رپورٹس کے مطابق اکتوبر 2023 سے جاری جنگ کے نتیجے میں غزہ کا بڑا حصہ تباہ ہو چکا ہے، جبکہ اسرائیلی فوج اس وقت بھی علاقے کے ایک بڑے حصے پر مؤثر کنٹرول رکھتی ہے۔

یاد رہے کہ امریکا کی ثالثی میں ہونے والی جنگ بندی کے تحت اسرائیلی فوج کو ایک مخصوص حد، جسے “یلو لائن” کہا جاتا ہے، تک واپس جانا تھا، تاہم نیتن یاہو کے تازہ بیان سے ظاہر ہوتا ہے کہ اسرائیل اپنی فوجی پیش قدمی جاری رکھنے کا ارادہ رکھتا ہے۔