دنیا کا سب سے مہنگا برگر 11 ہزار ڈالر کا، مگر ہر کوئی خرید نہیں سکتا

اسپین کے علاقے کیبریرا ڈی مار میں واقع اسادور آؤپا ریستوران نے دنیا کا سب سے مہنگا برگر متعارف کرایا ہے جس کی قیمت 11 ہزار امریکی ڈالر ہے۔

یہ ریستوران باسک کھانوں کے لیے مشہور ہے اور معروف شیف بوسکو جیمنیز المعروف بی ڈے وایکِنگو کے زیر انتظام ہے۔ اطلاعات کے مطابق اس منفرد برگر کو تیار کرنے میں آٹھ سال لگے، اور اس کے اجزاء کو خفیہ رکھا گیا ہے۔

یہ برگر کسی سونے یا زیورات سے نہیں بلکہ اپنی اعلیٰ معیار کی اجزاء اور خاص ذائقے کے تجربے کی وجہ سے منفرد ہے۔ تاہم، اسے خریدنے کے لیے صرف ریستوران کی خصوصی دعوت ضروری ہے۔

شیف بوسکو کے مطابق، مقصد ایک ایسا شاہانہ کھانا تیار کرنا تھا جو بظاہر سادہ مگر معیار میں بے مثال ہو۔ اگرچہ عام لوگ شاید اسے کبھی نہ چکھ سکیں، لیکن دنیا بھر میں اس برگر نے اپنی قیمت اور راز داری سے سب کو حیران کر دیا ہے۔