ہنجر وال میں جانوروں پر ظلم، غیر قانونی کلینک سے تین ملزمان گرفتار

لاہور کے علاقے ہنجر وال میں پولیس نے جانوروں کو غیر قانونی طور پر قید رکھنے، بھوکا مارنے اور کئی بلیوں کے بچوں کو قتل کرنے کے الزام میں تین افراد کو گرفتار کر لیا ہے۔

پولیس کے مطابق ملزمان کی شناخت علی رضا، کاشف اور حسن علی کے نام سے ہوئی ہے، جنہوں نے مارغزار کالونی میں ایک غیر قانونی جانوروں کا کلینک قائم کر رکھا تھا۔ اطلاع ملنے پر پولیس نے کارروائی کرتے ہوئے وہاں سے 10 بلیاں، تین مادہ کتے اور ان کے بچے بازیاب کرائے۔ کارروائی کے دوران پانچ بلی کے بچے مردہ پائے گئے۔

مقدمے (ایف آئی آر) کے مطابق ملزمان نے اعتراف کیا کہ وہ جانوروں کی ویڈیوز بنا کر سوشل میڈیا پر اپ لوڈ کرتے تھے۔ پولیس کا کہنا ہے کہ حسن علی خود کو ڈاکٹر ظاہر کر رہا تھا اور بغیر کسی قانونی اجازت یا لائسنس کے جانوروں کا معائنہ اور علاج کر رہا تھا۔

چھاپے کے دوران کئی حاملہ بلیوں کو بھی انتہائی تشویشناک حالت میں بازیاب کرایا گیا، جنہیں شدید غفلت اور بھوک کا سامنا تھا۔ تمام جانوروں کو طبی امداد اور بحالی کے لیے محفوظ مقام پر منتقل کر دیا گیا ہے۔

ہنجر وال پولیس نے سب انسپکٹر محمد بلال یحییٰ کی مدعیت میں مقدمہ درج کر کے تینوں ملزمان کو حراست میں لے لیا ہے جبکہ واقعے کی باقاعدہ تفتیش جاری ہے۔

پولیس حکام کا کہنا ہے کہ جانوروں پر ظلم اور غیر قانونی طبی سرگرمیوں میں ملوث عناصر کے خلاف سخت قانونی کارروائی کی جائے گی۔