رمضان میں وزن کم کرنے کے بجائے بڑھنے کی وجوہات

طبی ماہرین کا کہنا ہے کہ اگرچہ رمضان میں روزہ وزن کم کرنے میں مددگار ثابت ہوسکتا ہے، لیکن غیر متوازن غذا وزن میں اضافے کا باعث بن سکتی ہے۔ روزہ رکھنے کے بعد لوگ سمجھتے ہیں کہ وہ کچھ بھی کھا سکتے ہیں، مگر غیر ضروری کیلوریز وزن بڑھا دیتی ہیں۔

ماہرین غذائیت کے مطابق، روزے کے دوران جسم پہلے گلیکو جن سے توانائی حاصل کرتا ہے، اور بعد میں چربی کو جلانے کا عمل شروع ہوتا ہے۔ تاہم، زیادہ تلی ہوئی اشیاء، میٹھے اور ریفائنڈ کاربوہائیڈریٹس کا استعمال اس عمل کو متاثر کرتا ہے۔

ایک سموسے میں تقریباً 120 کیلوریز ہوتی ہیں، اور تین سموسے کھانے سے پورے کھانے کے برابر کیلوریز لی جاتی ہیں۔ ماہرین مشورہ دیتے ہیں کہ افطار کا آغاز پانی، سوپ یا لسی سے کریں، تاکہ بھوک کم ہو اور زیادہ کھانے سے بچا جا سکے۔

ماہرین صحت مند غذا، مناسب مقدار، اور پانی کی مقدار کو برقرار رکھنے کا مشورہ دیتے ہیں تاکہ رمضان میں وزن کو متوازن رکھا جا سکے۔