بین اسٹوکس نے چوٹ سے جلد صحتیابی کے لیے شراب نوشی چھوڑ دی، واپسی کا عزم

انگلینڈ کے ٹیسٹ کرکٹ ٹیم کے کپتان بین اسٹوکس نے انکشاف کیا ہے کہ انہوں نے رواں سال جنوری سے شراب نوشی ترک کر دی ہے تاکہ ہیمسٹرنگ انجری سے جلد صحتیاب ہو سکیں اور اپنے کیریئر کو طول دے سکیں۔

یہ بات انہوں نے سابق ریئلٹی ٹی وی اسٹار اسپینسر میتھیوز کے پوڈکاسٹ  میں گفتگو کے دوران بتائی۔
بین اسٹوکس نے کہا: “مجھے اپنی عادات میں تبدیلی لانی ہے… میں نے جنوری سے ایک قطرہ بھی نہیں پیا۔”

33 سالہ آل راؤنڈر کا کہنا تھا کہ اگرچہ یہ فیصلہ مستقل نہیں ہے، مگر اب وہ اپنی زندگی اور کھیل کے ساتھ زیادہ ذمہ داری سے پیش آ رہے ہیں۔ انہوں نے مزید کہا: “پہلے میرا رویہ ‘یا سب کچھ یا کچھ نہیں’ جیسا تھا، اب میں نے سیکھا ہے کہ اسے کس طرح کنٹرول کرنا ہے۔”

انہوں نے جدید کرکٹ کے تقاضوں پر بات کرتے ہوئے کہا کہ آج کل کا کیلنڈر بہت مصروف ہے اور کھلاڑی کے جسم میں برداشت کی گنجائش کم ہو گئی ہے۔

بین اسٹوکس، جو پہلے گھٹنے کی سرجری بھی کرا چکے ہیں، اس وقت بھی مکمل فٹ نہیں ہیں اور کاؤنٹی چیمپئن شپ میں ڈرہم کی جانب سے اب تک کوئی میچ نہیں کھیلا۔ تاہم، وہ سوشل میڈیا پر اپنی بحالی کی مشقوں کی جھلکیاں شیئر کرتے رہتے ہیں۔

انگلینڈ کی ہوم سیریز زمبابوے کے خلاف 22 مئی سے شروع ہو رہی ہے، اور اسٹوکس کو امید ہے کہ وہ اس میں حصہ لے سکیں گے۔ ان کی فٹ اور منظم واپسی انگلش ٹیم کے لیے بڑی خوشخبری ثابت ہو سکتی ہے۔