کراچی میں خوفناک خواب حقیقت بن گیا، شخص نے خود پر مٹی کا تیل چھڑک کر خودسوزی کر لی

اورنگی ٹاؤن کے علاقے قصبہ موڑ میں ایک 60 سالہ شخص نے بار بار خود کو آگ لگانے کے خواب دیکھنے کے بعد حقیقت میں اپنے جسم پر مٹی کا تیل ڈال کر آگ لگا دی۔ یہ افسوسناک واقعہ ہفتہ اور اتوار کی درمیانی شب شہزاد سنیما گلی نمبر 5 کے قریب پیش آیا۔

ریسکیو حکام کے مطابق اللہ رکھا ولد خوشی محمد نامی شخص بری طرح جھلس گیا تھا، جسے انتہائی تشویشناک حالت میں چھیپا ایمبولنس کے ذریعے سول اسپتال منتقل کیا گیا، جہاں وہ دورانِ علاج جانبر نہ ہو سکا۔

ایس ایچ او یوسف مہر کے مطابق ابتدائی تفتیش میں واقعہ خودسوزی ثابت ہوا ہے۔ متوفی نے اپنے جسم پر مٹی کا تیل چھڑک کر آگ لگائی تھی۔ پولیس کے مطابق اللہ رکھا کا تعلق پنڈی سے تھا اور وہ تقریباً 10 روز قبل اپنی سالی کے گھر کراچی آیا ہوا تھا۔

متوفی کی سالی نے پولیس کو بتایا کہ اللہ رکھا پچھلے تین دن سے ایک ہی خواب دیکھ رہا تھا کہ اس نے خود پر تیل ڈال کر آگ لگا دی ہے۔ ان خوابوں کی وجہ سے وہ شدید ذہنی پریشانی کا شکار تھا، اور اسی پریشانی میں اس نے خود سوزی کر لی۔

پولیس نے ضابطے کی کارروائی کے بعد لاش ورثا کے حوالے کر دی، جبکہ مزید تحقیقات جاری ہیں۔