سیاست
پاکستان کی سرزمین کا تحفظ غیر متزلزل ترجیح ہے: فیلڈ مارشل عاصم منیر
فیلڈ مارشل سید عاصم منیر نے واضح کیا ہے کہ پاکستان کی سرزمین کا تحفظ، قومی سالمیت اور ہر پاکستانی شہری کی حفاظت پاک فوج کی پہلی اور غیر متزلزل ترجیح ہے، اور اس حوالے سے کسی قسم کا سمجھوتہ نہیں کیا جائے گا۔
پاک فوج کے شعبۂ تعلقات عامہ (آئی ایس پی آر) کے مطابق نیشنل سیکیورٹی ورکشاپ–27 کے شرکا نے آج جنرل ہیڈکوارٹرز (جی ایچ کیو) کا دورہ کیا، جہاں انہیں قومی و علاقائی سیکیورٹی صورتحال سے متعلق تفصیلی بریفنگ دی گئی۔
نیشنل ڈیفنس یونیورسٹی کا یہ اہم تربیتی پروگرام ارکانِ پارلیمان، سینئر سول و عسکری افسران، ماہرینِ تعلیم اور سول سوسائٹی کے نمائندگان کو ایک پلیٹ فارم پر لاتا ہے تاکہ قومی سلامتی کے معاملات پر جامع آگاہی فراہم کی جا سکے۔
شرکا کے ساتھ خصوصی نشست میں آرمی چیف نے قومی اتحاد کو پاکستان کی اصل قوت قرار دیا۔ انہیں ملکی داخلی و خارجی سیکیورٹی ماحول اور مجموعی قومی سلامتی کی تفصیلات سے بھی آگاہ کیا گیا۔
فیلڈ مارشل عاصم منیر نے خطے میں بدلتے ہوئے سیکیورٹی حالات کا ذکر کرتے ہوئے کہا کہ بڑھتی ہوئی جیو پولیٹیکل کشمکش، سرحد پار دہشتگردی اور ہائبرڈ جنگ کے نئے چیلنجز نے صورتحال کو مزید پیچیدہ بنا دیا ہے۔
انہوں نے کہا کہ بیرونی حمایت یافتہ دہشتگردی اور معلوماتی جنگ کے باوجود پاکستان کی مسلح افواج، انٹیلی جنس ادارے اور قانون نافذ کرنے والے ادارے مضبوط عزم، اعلیٰ پیشہ ورانہ مہارت اور ثابت قدمی کے ساتھ قومی سلامتی کے دفاع میں مصروف ہیں۔
آرمی چیف نے کہا کہ پاکستان ایک باوقار ملک ہے اور عالمی برادری میں اسے اس کا جائز مقام ضرور ملے گا۔ ”معرکۂ حق“ کے دوران پاک افواج کی پیشہ ورانہ صلاحیت نے دنیا میں ملک کے وقار میں اضافہ کیا ہے۔
شرکا کو اسمگلنگ، منشیات کی ترسیل اور منظم جرائم کے خلاف جاری کارروائیوں کے علاوہ سرحدی انتظام بہتر بنانے اور غیر قانونی غیر ملکیوں کی واپسی سے متعلق تازہ پیش رفت سے بھی آگاہ کیا گیا۔
فیلڈ مارشل نے کہا کہ پاکستان کی سرزمین کا تحفظ، قومی سالمیت اور شہریوں کی حفاظت پاک فوج کی اولین ترجیح ہے، اور اس پر کوئی سمجھوتہ نہیں ہوگا۔ انہوں نے کہا کہ پائیدار امن، استحکام اور خوشحالی کے لیے وفاقی و صوبائی حکومتوں کے ساتھ ہم آہنگ قومی کوششیں ناگزیر ہیں۔
آخر میں انہوں نے کہا کہ پاک فوج ملکی اداروں کے ساتھ ہر ممکن تعاون جاری رکھے گی۔