چین کی ترقی دنیا کے لیے ایک مثال، پاکستان کو چین سے کوئی خطرہ نہیں, صدر زرداری

چین کے سرکاری دورے کے دوران صدر آصف علی زرداری نے چینی میڈیا کو انٹرویو دیتے ہوئے چین کی تیز رفتار ترقی کو دنیا کے لیے ایک مثال قرار دیا۔ انہوں نے کہا کہ چین نہ صرف ترقی کی راہ پر گامزن ہے بلکہ وہ دنیا کے کسی بھی ملک کے لیے خطرہ نہیں ہے۔

صدر زرداری نے کہا، “چین کی چند دہائیوں میں غیر معمولی ترقی حیران کن ہے۔ دنیا کو اس سے سیکھنا چاہیے۔” انہوں نے مزید کہا کہ چین دوسرے ممالک کے اندرونی معاملات میں مداخلت نہیں کرتا، جو کہ پاکستان کے لیے ایک مثبت اشارہ ہے۔

انہوں نے زور دیتے ہوئے کہا، “میں نے کبھی چین سے خوف محسوس نہیں کیا۔ میں کسی اور ملک سے خوفزدہ ہوسکتا ہوں، لیکن چین سے نہیں، کیونکہ میں پرامن بات چیت اور ہماری دوستی پر یقین رکھتا ہوں۔”

ان کے ان بیانات سے پاکستان اور چین کے گہرے سفارتی تعلقات اور اقتصادی اشتراک کی اہمیت مزید اجاگر ہوئی ہے۔