رانا ثناءاللہ کا دوٹوک اعلان: پاکستان کا مطالبہ واضح، قانونی اور ناقابلِ مذاکرات ہے

انہوں نے کہا کہ افغانستان کو بین الاقوامی قانون کے مطابق اس بات کو یقینی بنانا چاہیے کہ اس کی سرزمین پاکستان کے خلاف دہشتگردی کے لیے استعمال نہ ہو۔ رانا ثناءاللہ نے دعویٰ کیا کہ پاکستان نے ناقابلِ تردید شواہد پیش کیے ہیں اور افغان حکام کو چاہیے کہ وہ دہشتگردوں کی سرگرمیاں روکیں اور ایک مؤثر نظام تشکیل دیں۔

اگرچہ ان کا لہجہ سخت تھا، مگر انہوں نے افغانستان کو برادر اسلامی ملک قرار دیتے ہوئے کہا کہ پاکستان نے گزشتہ 40 برس سے افغان عوام کی میزبانی اور خدمت کی ہے۔ تاہم، انہوں نے موجودہ افغان حکمرانوں کو فتنہ خوارج قرار دیتے ہوئے الزام لگایا کہ بھارت انہیں پاکستان کے خلاف اکسا رہا ہے اور مالی امداد فراہم کر رہا ہے۔

رانا ثناءاللہ نے کہا کہ پاکستان کی فوج اور قیادت ملک کے دفاع کے لیے مکمل طور پر تیار ہیں، اور خبردار کیا کہ اگر افغانستان نے سرحدی تحفظ کی ذمہ داری پوری نہ کی تو پاکستان خود یہ ضمانت حاصل کرے گا۔

انہوں نے کہا کہ ضرورت پڑی تو سرحد پر ’بفر زون‘ قائم کیا جائے گا تاکہ قومی سلامتی یقینی بنائی جا سکے۔