جنوبی کوریا میں صدر شی جن پنگ اور صدر ٹرمپ کی ملاقات، تجارتی کشیدگی کم ہونے کی امید

چین نے بدھ کے روز تصدیق کی کہ صدر شی جن پنگ جمعرات کو جنوبی کوریا میں امریکی صدر ڈونلڈ ٹرمپ سے ملاقات کریں گے، جسے دنیا بھر کے سرمایہ کار طویل عرصے سے جاری تجارتی تنازع کے خاتمے کی ایک اہم پیشرفت قرار دے رہے ہیں۔

چینی وزارتِ خارجہ کے ترجمان کے مطابق دونوں رہنما بوسان میں “اسٹریٹیجک اور طویل المدتی امور پر تفصیلی بات چیت” کریں گے، تاہم ممکنہ تجارتی معاہدے کا براہِ راست ذکر نہیں کیا گیا۔

ترجمان گو جیاکون نے کہا کہ “چین اور امریکہ اس ملاقات کو مثبت نتائج تک پہنچانے اور تعلقات کے استحکام کے لیے مشترکہ کوششوں پر تیار ہیں۔”

صدر ٹرمپ نے بھی جنوبی کوریا جاتے ہوئے طیارے میں صحافیوں سے گفتگو میں کہا کہ وہ اور صدر شی “دونوں ممالک کے لیے ایک اچھا معاہدہ” حاصل کرنے والے ہیں۔

تجزیہ کاروں کے مطابق نایاب معدنیات، چپس، فینٹانائل اور سویابین کے معاملات پر جاری کشیدگی کے باوجود اس ملاقات کی خبروں نے عالمی منڈیوں میں استحکام پیدا کیا ہے۔

چینی سرکاری کمپنی نے امریکہ سے تین سویابین کارگو خرید کر خیرسگالی کا اشارہ دیا ہے، جو اس سال کی امریکی فصل سے پہلی خریداری ہے۔

صدر شی جمعرات سے ہفتہ تک ایشیا پیسفک اکنامک کوآپریشن اجلاس اور جنوبی کوریا کے سرکاری دورے میں شرکت کریں گے، جبکہ صدر ٹرمپ علاقائی اجلاس میں شریک نہیں ہوں گے۔