خیبرپختونخوا کا سافٹ امیج کھیلوں سے اجاگر ہوگا، گورنر فیصل کریم کنڈی

گورنر خیبرپختونخوا فیصل کریم کنڈی نے کہا ہے کہ محنتی اور نئے آئیڈیاز کے حامل نوجوان صوبے کا سب سے قیمتی اثاثہ ہیں۔ ان خیالات کا اظہار انہوں نے ڈی ایچ اے پشاور میں لینڈ روور ڈیفنڈر 6×6 کی لانچنگ تقریب سے خطاب کرتے ہوئے کیا، جہاں وہ مہمان خصوصی تھے۔

تقریب کا انعقاد خیبرپختونخوا موٹر ایسوسی ایشن نے کیا تھا، جس میں صدر بابر خان یوسفزئی اور سیکریٹری بریگیڈیئر حنیف اللہ سمیت دیگر عہدیداران شریک تھے۔

گورنر نے کہا کہ خیبرپختونخوا میں موٹر اسپورٹس کی ترقی نہ صرف تفریح کا ذریعہ ہے بلکہ یہ عالمی سطح پر صوبے کا مثبت تاثر اجاگر کرنے میں مددگار ثابت ہو سکتی ہے۔ انہوں نے اس بات پر افسوس کا اظہار کیا کہ گزشتہ 13 سال سے صوبے میں فرسٹ کلاس کرکٹ میچ منعقد نہیں ہوا، حالانکہ پاکستان کرکٹ ٹیم میں کے پی سے تعلق رکھنے والے متعدد کھلاڑی شامل ہیں۔

گورنر نے اعلان کیا کہ 26 جولائی کو گورنر ہاؤس پشاور میں “گورنر کے پی سپورٹس ایوارڈز” منعقد ہوں گے، اور اس کے بعد ’اڈاپٹ پلیئر‘ مہم کا آغاز کیا جائے گا۔

اس موقع پر بابر خان یوسفزئی نے گورنر کی عوام دوست شخصیت کو سراہتے ہوئے ان کا کھلاڑیوں کی حوصلہ افزائی پر شکریہ ادا کیا۔