گورنر خیبرپختونخوا کا وزیراعلیٰ پر شدید حملہ, کرپشن، بدانتظامی اور سیاسی تماشہ جاری ہے

گورنر خیبر پختونخوا فیصل کنڈی نے وزیراعلیٰ علی امین گنداپور اور پی ٹی آئی حکومت پر کڑی تنقید کرتے ہوئے انہیں کرپشن، اندرونی خلفشار، اور ناقص حکمرانی کا ذمہ دار قرار دیا ہے۔

میڈیا سے گفتگو میں کنڈی نے کہا کہ وزیراعلیٰ کو فیصلہ کرنا ہوگا کہ وہ متنازع مائنز اینڈ منرلز بل پاس کریں گے یا اپنی سیٹ بچائیں گے۔ انہوں نے کہا: “علی امین گنداپور اسلام آباد سے احکامات پر عمل کر رہے ہیں جیسے کوئی فرماں بردار بچہ ہو۔”

انہوں نے الزام عائد کیا کہ سرکاری ٹیکس کا پیسہ جلسوں اور ذاتی عیاشیوں پر خرچ ہو رہا ہے۔ “خود پی ٹی آئی کے وزراء ایک دوسرے پر کرپشن کے الزامات لگا رہے ہیں۔”

گورنر نے سوال اٹھایا کہ اگر وزیراعلیٰ خود کہہ رہے ہیں کہ ان کے وزراء چور ہیں تو نیب اور ایف آئی اے کہاں ہیں؟ انہوں نے افغانستان سے بات چیت پر بھی اعتراض کیا اور کہا کہ چین سے تعلقات کیوں نظرانداز کیے جا رہے ہیں؟

کنڈی نے وزیر اعظم شہباز شریف سے مطالبہ کیا کہ وہ خیبر پختونخوا کا دورہ کریں اور صوبے کو پی ٹی آئی کے رحم و کرم پر نہ چھوڑیں۔