گرفتاریوں پر گوہر علی خان کا شدید ردعمل

پاکستان تحریکِ انصاف کے چیئرمین بیرسٹر گوہر علی خان نے سانحہ 9 مئی سے متعلق فیصل آباد میں سنائی گئی سزاؤں کو جمہوریت کیلئے سیاہ دن قرار دیتے ہوئے کہا ہے کہ یہ ایک کھلی سیاسی انتقام کی مثال ہے اور پی ٹی آئی کو شعوری طور پر نظام سے باہر نکالا جا رہا ہے۔

میڈیا سے گفتگو میں گوہر نے کہا:
“آج جمہوریت کا افسوسناک دن ہے۔ ہمارے قائدین، جن میں سنی اتحاد کونسل کے رہنما بھی شامل ہیں، کو غیر منصفانہ طور پر سزائیں دی گئی ہیں۔ یہ وہ لوگ ہیں جو ہمیشہ نظام کا احترام کرتے رہے ہیں۔”

انہوں نے کہا کہ پی ٹی آئی نے ہمیشہ پارلیمان کو مضبوط بنانے اور جمہوری نظام کا حصہ بننے کی کوشش کی ہے، مگر اب ہمارے رہنما بے جرم و خطا جیلوں میں ہیں۔
“ہم نے چیف جسٹس سے بھی یہ بات صاف کہی ہے کہ انصاف ہونا چاہیے۔”

گوہر علی خان نے واضح کیا کہ پی ٹی آئی نے کبھی انتشار کو ترجیح نہیں دی بلکہ ہمیشہ بات چیت کو فوقیت دی، اور پی ٹی آئی بانی نے بار بار مفاہمت کا پیغام دیا۔

انہوں نے عدالتی نظام پر عوامی اعتماد ختم ہونے کے خطرے کی نشاندہی کرتے ہوئے کہا کہ
“اگر یہی صورتحال رہی تو نظام بیٹھ جائے گا، کیونکہ کچھ عناصر اندر سے اسے کھوکھلا کر رہے ہیں۔”
انہوں نے اعلان کیا کہ یہ فیصلے اعلیٰ عدالتوں میں چیلنج کیے جائیں گے، اور بہت جلد پی ٹی آئی اپنی آئندہ سیاسی حکمت عملی کا اعلان کرے گی۔