سیاست
کرک آپریشن میں فتنۃ الخوارج کا خطرناک کمانڈر نثار حکیم ہلاک، چار پولیس اہلکار زخمی
کرک کے علاقے امبیری کلہ میں سیکیورٹی فورسز کے ایک مشترکہ ٹارگٹڈ آپریشن کے دوران کالعدم تنظیم کا انتہائی مطلوب کمانڈر نثار حکیم ہلاک ہوگیا۔
ایکسپریس نیوز کے مطابق، یہ آپریشن سی ٹی ڈی خیبرپختونخوا، ضلعی پولیس اور سویلین انٹیلی جنس ادارے کی مشترکہ کارروائی کے نتیجے میں کیا گیا۔
چار گھنٹے سے زائد جاری رہنے والے اس آپریشن کے دوران فتنۃ الخوارج کا خطرناک دہشتگرد کمانڈر اپنے انجام کو پہنچا، جب کہ چار پولیس اہلکار معمولی زخمی ہوئے۔ دہشتگرد کے قبضے سے اسلحہ اور گولہ بارود بھی برآمد کیا گیا۔
آئی جی خیبرپختونخوا ذوالفقار حمید نے کامیاب آپریشن پر پولیس اور سی ٹی ڈی ٹیموں کو خراجِ تحسین پیش کرتے ہوئے کہا:
“جو جوان اپنی جان خطرے میں ڈال کر عوام کے تحفظ اور وطن کے امن کے لیے لڑ رہے ہیں، وہ ہمارے فخر ہیں۔ خیبرپختونخوا پولیس دہشتگردی کے خلاف سیسہ پلائی دیوار ہے۔”
یہ کارروائی صوبے میں امن و امان کے قیام اور دہشتگردی کے مکمل خاتمے کی جانب ایک اہم پیش رفت قرار دی جا رہی ہے۔