پاکستان اور ازبکستان کے درمیان دفاعی تعلقات مزید مستحکم ہونے کا امکان

راولپنڈی میں جوائنٹ سٹاف ہیڈکوارٹرز میں چیئرمین جوائنٹ چیفس آف سٹاف کمیٹی جنرل ساحر شمشاد مرزا نے ازبک نائب وزیر دفاع میجر جنرل برخانوف احمد جمالووچ سے اہم ملاقات کی۔ اس ملاقات میں دونوں ممالک کے درمیان دفاعی تعلقات، خطے میں بدلتی سیکیورٹی صورتحال اور دوطرفہ اسٹریٹجک دلچسپی کے امور پر تبادلۂ خیال کیا گیا۔

ازبک نائب وزیر دفاع کے جوائنٹ سٹاف ہیڈکوارٹرز پہنچنے پر تینوں مسلح افواج کے چاق و چوبند دستوں نے انہیں گارڈ آف آنر پیش کیا۔ آئی ایس پی آر کے مطابق فریقین نے باہمی فوجی تعاون کو مزید وسعت دینے پر اتفاق کیا اور ازبک نائب وزیر دفاع نے پاکستان کی مسلح افواج کی پیشہ ورانہ مہارت کی بھرپور تعریف کی۔

یہ ملاقات پاکستان اور ازبکستان کے درمیان دفاعی شراکت داری کو مزید مستحکم کرنے کی جانب ایک اہم پیشرفت سمجھی جا رہی ہے۔