وزیراعظم شہباز شریف کا بڑا فیصلہ، آئینی ترمیم پر سیاسی اتفاقِ رائے کے لیے وزرا کے غیر ملکی دورے منسوخ

وزیراعظم شہباز شریف نے آئینی ترمیم کے معاملے پر اہم فیصلہ کرتے ہوئے تمام وزرا اور ارکانِ پارلیمنٹ کے غیر ملکی دورے منسوخ کر دیے ہیں اور انہیں اسلام آباد میں موجود رہنے کی ہدایت جاری کر دی ہے۔

ذرائع کے مطابق وزیراعظم کا مقصد آئینی ترمیم پر تمام سیاسی جماعتوں کے درمیان اتفاق رائے پیدا کرنا ہے۔
اس مقصد کے لیے اسپیکر قومی اسمبلی ایاز صادق کو خصوصی ٹاسک سونپا گیا ہے، جنہوں نے آج شام 4 بجے پارلیمنٹ ہاؤس میں پارلیمانی رہنماؤں کا اجلاس طلب کر لیا ہے۔

اجلاس میں تحریکِ انصاف، جے یو آئی (ف) اور دیگر بڑی جماعتوں کے پارلیمانی لیڈرز کو مدعو کیا گیا ہے۔
ذرائع کے مطابق اجلاس میں آئینی ترمیم کے خدوخال پر بریفنگ دی جائے گی جبکہ حکومت منظوری کے لیے اپنی حکمتِ عملی طے کرے گی۔

ذرائع نے یہ بھی بتایا ہے کہ اگر سیاسی اتفاقِ رائے نہ ہو سکا تو حکومت اپنی نمبرز گیم پر انحصار کرے گی۔
پارلیمانی ذرائع کے مطابق ستائیسویں آئینی ترمیم کو 7 نومبر کو سینیٹ میں پیش کرنے کا فیصلہ کیا گیا ہے، جبکہ مسلم لیگ (ن) اور اتحادی جماعتوں کو قومی اسمبلی میں 224 اراکین کی حمایت حاصل ہے۔