محکمہ داخلہ خیبرپختونخوا نے اپر جنوبی وزیرستان میں کرفیو نافذ کر دیا

محکمہ داخلہ خیبرپختونخوا نے اپر جنوبی وزیرستان میں کرفیو نافذ کر دیا ہے۔ یہ فیصلہ وزیراعلیٰ خیبرپختونخوا کے حالیہ احکامات کے بعد سامنے آیا ہے، جس میں انہوں نے ضلعی انتظامیہ سے کرفیو اور دفعہ 144 کے نفاذ کے اختیارات واپس لے لیے تھے۔

یہ پہلا موقع ہے کہ ضلعی انتظامیہ کو بائی پاس کرتے ہوئے محکمہ داخلہ نے براہِ راست سیکیورٹی صورتحال پر کارروائی کی ہے۔ کرفیو کے نفاذ کی وجوہات کے حوالے سے سرکاری سطح پر کوئی وضاحت جاری نہیں کی گئی، تاہم ذرائع کا کہنا ہے کہ علاقے میں کشیدگی اور سیکیورٹی خدشات کے باعث یہ فیصلہ کیا گیا۔

یاد رہے کہ وزیراعلیٰ خیبرپختونخوا نے کچھ روز قبل ایک اعلامیہ کے ذریعے ضلعی افسران کو ہدایات دی تھیں کہ کرفیو یا دفعہ 144 کے نفاذ کے لیے پیشگی اجازت لینا ضروری ہو گا، اور یہ اختیار براہ راست صوبائی محکمہ داخلہ کو منتقل کر دیا گیا تھا۔

علاقہ مکینوں نے کرفیو کے اچانک نفاذ پر تشویش کا اظہار کیا ہے اور شفاف معلومات کی فراہمی کا مطالبہ کیا ہے۔