اے این ایف کی بڑی کارروائیاں، ملک بھر سے کروڑوں کی منشیات برآمد، 3 اسمگلر گرفتار

اینٹی نارکوٹکس فورس (اے این ایف) نے ملک کے مختلف علاقوں میں منشیات کے خلاف بڑی کارروائیاں کرتے ہوئے 240.915 کلوگرام منشیات برآمد کر لیں جن کی بازاری مالیت ایک کروڑ 86 لاکھ روپے سے زائد بتائی گئی ہے۔ ان کارروائیوں میں 3 افراد کو گرفتار بھی کیا گیا ہے۔

ترجمان کے مطابق:

پہلی کارروائی گلبرگ لاہور کے ایک کوریئر آفس پر ہوئی، جہاں پرتگال بھیجے جانے والے پارسل میں موجود ٹینس بالز کے اندر چھپائی گئی 365 گرام آئس برآمد کی گئی۔

دوسری کارروائی لاہور داتا دربار کے قریب کی گئی، جہاں ایک گاڑی کی تلاشی کے دوران 2 کلوگرام آئس اور 150 گرام ویڈ برآمد ہوئی۔ اس موقع پر دو ملزمان گرفتار ہوئے۔

تیسری کارروائی سمبڑیال کے نزدیک وزیرآباد روڈ پر کی گئی، جہاں ایک ملزم کے قبضے سے 3.6 کلوگرام چرس برآمد ہوئی۔

چوتھی اور سب سے بڑی کارروائی بلوچستان کے ساحلی علاقے گوادر میں کی گئی، جہاں غیر آباد مقام میر جٹ میں اسمگلنگ کے لیے چھپائی گئی 234.8 کلوگرام چرس کو بازیاب کر لیا گیا۔

حکام کے مطابق، گرفتار ملزمان کے خلاف مقدمات درج کر لیے گئے ہیں اور تفتیش جاری ہے جس میں مزید انکشافات متوقع ہیں۔ اے این ایف نے اعادہ کیا ہے کہ منشیات کے خلاف مہم بلا امتیاز جاری رہے گی۔