اپر کوہستان میں اربوں روپے کی کرپشن, فرضی کمپنی، جعلی چیکس اور ڈمپر ڈرائیور کے کھاتے میں اربوں روپے

خیبر پختونخوا کے ضلع اپر کوہستان میں سی اینڈ ڈبلیو ڈیپارٹمنٹ سے منسلک اربوں روپے کے مالیاتی اسکینڈل نے سب کو حیران کر دیا ہے۔ ذرائع کے مطابق 2020 سے 2024 کے دوران سرکاری فنڈز سے 40 ارب روپے سے زائد کی رقم مختلف بینک اکاؤنٹس میں منتقل کی گئی۔

تحقیقات کے دوران یہ انکشاف ہوا کہ ایک عام ڈمپر ڈرائیور کے ذاتی اکاؤنٹ میں ساڑھے چار ارب روپے موجود ہیں۔ اس ڈرائیور نے ایک جعلی کنسٹرکشن کمپنی کے نام پر فنڈز کو ذاتی کھاتوں میں منتقل کیا۔ اس مقصد کے لیے تقریباً 1000 جعلی چیکس جاری کیے گئے۔

اپر کوہستان میں ترقیاتی منصوبوں، کنٹریکٹرز کی سیکیورٹیز، اور دیگر فنڈز کو چالاکی سے خردبرد کیا گیا۔ ریکارڈ میں رد و بدل، جعلی سیکورٹی ریفنڈز، اور فرضی بلوں کی منظوری دی گئی۔ ڈسٹرکٹ اکاؤنٹ آفیسر نے بھی مالی قوانین کی صریح خلاف ورزیاں کرتے ہوئے غیر مجاز ادائیگیاں منظور کیں۔

اینٹی منی لانڈرنگ قوانین کو بھی نظر انداز کرتے ہوئے سرکاری رقوم کو نجی اکاؤنٹس میں منتقل کیا گیا۔ فی الحال 50 سے زائد بینک اکاؤنٹس منجمد کیے جا چکے ہیں جبکہ مزید تحقیقات جاری ہیں۔ حکام نے کہا ہے کہ ملوث افراد کو قانون کے کٹہرے میں لایا جائے گا۔