امیرِ قطر کا آئندہ سال دورۂ پاکستان کا اعلان، صدر آصف زرداری سے دوحا میں اہم ملاقات

دوحا میں صدرِ مملکت آصف علی زرداری اور امیرِ قطر شیخ تمیم بن حمد الثانی کے درمیان اہم ملاقات ہوئی، جس میں دوطرفہ تعلقات، دفاعی تعاون اور اقتصادی شراکت کے نئے امکانات پر تبادلہ خیال کیا گیا۔

امیرِ قطر نے پاکستان اور اس کی کامیابیوں پر فخر کا اظہار کرتے ہوئے پاکستانی کمیونٹی کے کردار کی تعریف کی اور ان کی تعداد میں اضافہ کرنے کی خواہش ظاہر کی۔

صدر آصف زرداری نے حکومتِ پاکستان اور عوام کی جانب سے نیک تمناؤں کا پیغام پہنچایا اور قطر کی ترقی و قیادت کو سراہا۔ دونوں رہنماؤں نے تاریخی و برادرانہ تعلقات کو مزید مضبوط بنانے پر اتفاق کیا۔

امیرِ قطر نے پاکستان، سعودی عرب دفاعی معاہدے کو بروقت اور مثبت قدم قرار دیا اور کہا کہ پاکستان منفرد حیثیت رکھتا ہے جو چین، مغرب اور خلیجی ممالک کے ساتھ متوازن تعلقات رکھتا ہے۔

صدر زرداری نے دفاع، زراعت، غذائی تحفظ اور دفاعی پیداوار کے شعبوں میں تعاون بڑھانے کی تجویز دی، جس پر امیرِ قطر نے فوری رابطوں کی ہدایت کی۔

امیرِ قطر نے افغانستان کے حوالے سے پاکستان کے مثبت کردار کو سراہا اور امید ظاہر کی کہ دونوں ہمسایہ ممالک حالیہ چیلنجز پر قابو پا لیں گے۔ انہوں نے صدر زرداری کی دعوت قبول کرتے ہوئے آئندہ سال کے اوائل میں پاکستان کے دورے کا اعلان بھی کیا۔

ملاقات میں چیئرمین پیپلز پارٹی بلاول بھٹو زرداری اور پاکستانی سفیر بھی موجود تھے۔