امریکا اور اقوام متحدہ کی سلامتی کونسل نے شامی صدر احمد الشراع اور وزیر داخلہ انس خطاب پر عائد پابندیاں ختم کر دیں

عالمی خبر ایجنسی کے مطابق امریکی محکمہ خزانہ نے جمعہ کے روز شامی صدر احمد الشراع کا نام دہشت گردوں کی عالمی فہرست سے نکال دیا۔ اسی روز اقوام متحدہ کی سلامتی کونسل نے بھی شام کے صدر اور وزیر داخلہ انس خطاب کے خلاف عائد پابندیاں ختم کرنے کی منظوری دے دی۔

اجلاس میں پیش کی جانے والی امریکی قرارداد کے حق میں 14 ممالک نے ووٹ دیا جبکہ کسی نے مخالفت نہیں کی۔ چین نے رائے شماری میں حصہ نہیں لیا۔ پاکستان نے قرارداد کے حق میں ووٹ دے کر اس کی حمایت کی۔

اقوام متحدہ میں امریکا کے سفیر مائیک والٹز نے کہا کہ یہ اقدام ایک مضبوط سیاسی اشارہ ہے جو ظاہر کرتا ہے کہ شام ایک نئے دور میں داخل ہو چکا ہے۔ انہوں نے کہا کہ اس فیصلے سے شامی عوام کے لیے ترقی کے نئے مواقع پیدا ہوں گے۔

پاکستان کے مستقل مندوب عاصم افتخار احمد نے قرارداد کا خیرمقدم کرتے ہوئے کہا کہ یہ قدم شام کے مستقبل کے سفر میں ایک مثبت پیش رفت ہے جو مواقع اور چیلنجز دونوں کے ساتھ آگے بڑھنے کی علامت ہے۔

واضح رہے کہ یہ فیصلہ اس ملاقات سے قبل سامنے آیا ہے جو آئندہ ہفتے شامی صدر احمد الشراع اور امریکی صدر ڈونلڈ ٹرمپ کے درمیان متوقع ہے۔