پی ٹی آئی بانی کو رہا کرا کے رہیں گے، لاہور بار کے لیے 5 کروڑ روپے کی گرانٹ

وزیر اعلیٰ خیبر پختونخوا علی امین گنڈا پور نے لاہور ہائیکورٹ بار ایسوسی ایشن میں پُرجوش خطاب کیا، جس میں انہوں نے پی ٹی آئی کے بانی رہنما کی رہائی کو یقینی بنانے کا عزم ظاہر کیا۔ ان کا کہنا تھا کہ ہمارا قائد اور ان کی اہلیہ جیل میں ہیں، مگر ہم ان کی رہائی کی جنگ ہر صورت جیتیں گے۔

خطاب کے دوران انہوں نے کہا، “ہماری آواز کو دبایا نہیں جا سکتا، ہم اپنے قائد کو ہر حال میں رہا کرا کے رہیں گے۔” انہوں نے وکلاء برادری سے اپیل کی کہ وہ متحد ہوں اور اس نازک وقت میں آئین و انصاف کا ساتھ دیں۔

علی امین گنڈا پور نے طاقت کے کھیل پر تنقید کرتے ہوئے کہا کہ ملک میں اصل طاقت کو عوام کے فیصلوں سے نہیں، کسی اور کے اشارے پر چلایا جا رہا ہے۔ انہوں نے زور دیا: “متحد ہوں، وقت قریب ہے، اور کامیابی ہمارا مقدر ہے۔”

اس موقع پر وزیر اعلیٰ نے لاہور ہائیکورٹ بار ایسوسی ایشن کے لیے 5 کروڑ روپے کی گرانٹ کا اعلان بھی کیا اور وکلاء کے کردار کو خراج تحسین پیش کیا۔

خطاب کا اختتام انہوں نے اس امید کے ساتھ کیا کہ پی ٹی آئی بانی بہت جلد اپنی عوام میں موجود ہوں گے، اور ان کی رہائی تحریک کو نئی طاقت دے گی۔