محکمہ موسمیات نے خیبرپختونخوا میں 20 تا 25 جولائی موسلادھار بارشوں کی پیشگوئی کر دی

محکمہ موسمیات پاکستان نے خیبرپختونخوا میں 20 تا 25 جولائی موسلادھار بارشوں اور تیز ہواؤں کی پیشگوئی کر دی ہے، جس سے صوبے کے کئی علاقوں میں سیلاب اور لینڈ سلائیڈنگ کا خطرہ پیدا ہو گیا ہے۔ مون سون کے اس نئے سسٹم کے ساتھ مغربی ہواؤں کا سلسلہ بھی شامل ہوگا، جو بارشوں کی شدت کو مزید بڑھا سکتا ہے۔

ریجنل میٹ آفس پشاور کے مطابق جن اضلاع میں بارشوں کا امکان ہے ان میں سوات، چترال، دیر، مالاکنڈ، مانسہرہ، ایبٹ آباد، کوہستان، پشاور، مردان، صوابی، باجوڑ، مہمند، خیبر، کرک، بنوں، لکی مروت، ڈی آئی خان، ٹانک، اور وزیرستان شامل ہیں۔

اس صورت حال میں پی ڈی ایم اے نے تمام ڈپٹی کمشنرز کو ہدایات جاری کر دی ہیں کہ وہ حفاظتی اقدامات کریں، اور عوام کو خطرناک علاقوں سے دور رہنے کی تلقین کریں۔ شہریوں اور سیاحوں کو بھی محتاط رہنے اور غیر ضروری سفر سے گریز کرنے کی ہدایت کی گئی ہے۔