غزہ جنگ بندی خطرے میں، امریکی قیادت کی ہنگامی مداخلت، وفد اسرائیل روانہ

امریکی نائب صدر جی ڈے وینس، صدر ڈونلڈ ٹرمپ کے داماد جیرڈ کشنر، اور خصوصی ایلچی برائے مشرقِ وسطیٰ اسٹیو وٹکوف امن معاہدہ بچانے کے لیے اسرائیل روانہ ہوگئے ہیں۔

غیر ملکی خبر رساں ادارے کے مطابق امریکی وفد کا مقصد غزہ سیز فائر معاہدے کے مکمل نفاذ کو یقینی بنانا اور فریقین کے درمیان بڑھتی کشیدگی کو کم کرنا ہے۔

ادھر حماس کے وفد کی قیادت خلیل الحیہ کر رہے ہیں، جو قاہرہ میں مصری حکام سے جنگ بندی پر عمل درآمد کے طریقہ کار پر بات چیت کر رہے ہیں۔

جیرڈ کشنر نے روانگی سے قبل میڈیا سے گفتگو میں کہا:

“حماس اپنے وعدوں پر عمل کر رہی ہے، غزہ امن معاہدہ 100 فیصد کامیاب ہوگا، ہم اس کی ناکامی کے متحمل نہیں ہو سکتے۔”

دوسری جانب اسرائیلی فوج نے اعلان کیا ہے کہ وہ دوبارہ سیز فائر کے نفاذ پر عمل شروع کر رہی ہے، تاہم جنگ بندی کے باوجود اسرائیلی حملوں میں اب تک 45 فلسطینی شہید ہو چکے ہیں، جبکہ 10 اکتوبر سے اب تک مجموعی طور پر 98 فلسطینی جامِ شہادت نوش کر چکے ہیں۔

تجزیہ کاروں کا کہنا ہے کہ غزہ امن معاہدہ انتہائی نازک مرحلے میں داخل ہو چکا ہے، اور امریکی وفد کی اسرائیل آمد اس بات کی علامت ہے کہ واشنگٹن کسی بھی قیمت پر اس معاہدے کو ناکام نہیں ہونے دینا چاہتا۔