پاکستان موسمیاتی تبدیلی سے شدید متاثرہ ممالک میں شامل ہے: وزیراعظم شہباز شریف

وزیر اعظم شہباز شریف نے گلگت بلتستان میں حالیہ شدید بارشوں اور کلاؤڈ برسٹ کے بعد دورہ کیا اور نقصانات کا جائزہ لیا۔ انہوں نے کہا کہ پاکستان دنیا کے ان 10 ممالک میں شامل ہے جو موسمیاتی تبدیلیوں سے سب سے زیادہ متاثر ہو رہے ہیں، حالانکہ کاربن گیسوں کے اخراج میں ہمارا حصہ نہ ہونے کے برابر ہے۔

وزیر اعظم نے گورنر گلگت بلتستان سید مہدی شاہ اور وزیر اعلیٰ گلبر خان سے ملاقات کی، جنہوں نے حالیہ صورتحال، ترقیاتی منصوبوں، اور امن و امان کے حوالے سے بریفنگ دی۔ وزیر اعلیٰ نے ریسکیو اور امدادی کارروائیوں کی تفصیلات بھی پیش کیں، جبکہ گلگت بلتستان میں دانش اسکولوں کے قیام پر وزیر اعظم کو خراج تحسین پیش کیا گیا۔

وزیر اعظم متاثرہ علاقوں کا دورہ کریں گے، متاثرین سے ملاقات کریں گے اور امدادی رقوم تقسیم کریں گے۔ ان کے ہمراہ وفاقی وزراء اور مشیران بھی موجود ہیں جن میں عبدالعلیم خان، عطاء تارڑ، انجینئر امیر مقام، ڈاکٹر مصدق ملک، رانا ثناء اللہ اور شبیر عثمانی شامل ہیں۔

وزیر اعظم نے کہا کہ ماحولیاتی تبدیلی سے نمٹنے کے لیے ہنگامی اقدامات ضروری ہیں اور پاکستان کو ماحولیاتی انصاف کی عالمی سطح پر اشد ضرورت ہے۔