غیر ملکی امداد میں کمی کے باعث غذائی قلت سے 652 بچے ہلاک

ڈاکٹرز وِدآؤٹ بارڈرزنے انکشاف کیا ہے کہ نائجیریا کی ریاست کتسینا میں 2025 کے صرف پہلے چھ ماہ کے دوران 652 بچے شدید غذائی قلت کے باعث جان کی بازی ہار چکے ہیں۔

  بچوں کی اموات کی بنیادی وجہ عالمی امدادی اداروں — بالخصوص امریکہ، برطانیہ، اور یورپی یونین — کی جانب سے دی جانے والی فنڈنگ میں شدید کمی ہے۔

رپورٹ میں بتایا گیا ہے کہ شدید غذائی قلت کے کیسز میں پچھلے سال کی نسبت 208 فیصد اضافہ ہو چکا ہے۔ نائجیریا کی حکومت نے اس مسئلے سے نمٹنے کے لیے 200 ارب نائرا (130 ملین ڈالر) کا بجٹ مختص کیا ہے، لیکن زمینی حقائق اس سے مختلف کہانی سنا رہے ہیں۔

کتسینا میں بدامنی، اغواء برائے تاوان اور عسکریت پسندی نے حالات مزید بدتر کر دیے ہیں، جس سے ہزاروں افراد بے گھر ہو چکے ہیں اور زرعی سرگرمیاں معطل ہو چکی ہیں۔

اقوامِ متحدہ کا عالمی خوراک پروگرام بھی خبردار کر چکا ہے کہ وہ جولائی کے اختتام تک نائجیریا کے شمال مشرق میں 13 لاکھ افراد کے لیے غذائی امداد بند کرنے پر مجبور ہو جائے گا۔