روہت شرما پہلی بار آئی سی سی ون ڈے رینکنگ میں نمبر ون، بابراعظم چوتھے نمبر پر پہنچ گئے

بھارتی سابق کپتان روہت شرما نے اپنی شاندار کارکردگی کے باعث کیریئر میں پہلی مرتبہ آئی سی سی ون ڈے بیٹنگ رینکنگ میں نمبر ون پوزیشن حاصل کرلی۔

روہت نے آسٹریلیا کے خلاف سڈنی میں کھیلے گئے میچ میں ناقابلِ شکست سنچری بنائی، جس میں انہوں نے 13 چوکے اور 3 چھکے لگائے، اور بھارت کو نو وکٹوں سے شاندار فتح دلائی۔

اس کارکردگی کے بعد وہ دو درجے ترقی پا کر پہلے نمبر پر آگئے جبکہ افغانستان کے ابراہیم زدران دوسرے اور شبمن گل تیسرے نمبر پر ہیں۔ پاکستان کے بابر اعظم کی رینکنگ ایک درجے گر کر چوتھے نمبر پر آگئی۔

بولنگ میں افغانستان کے راشد خان بدستور سرفہرست ہیں، جبکہ بھارت کے اکشر پٹیل چھ مقامات اوپر آ کر 31 ویں نمبر پر پہنچ گئے ہیں۔

ٹیسٹ رینکنگ میں شان مسعود پانچ درجے ترقی پا کر 42 ویں نمبر پر آگئے ہیں، جبکہ محمد رضوان پانچ درجے نیچے جا کر 21 ویں نمبر پر پہنچ گئے۔ نعمان علی دوسرے سے تیسرے نمبر پر چلے گئے جبکہ جسپریت بمراہ نے پہلا مقام حاصل کرلیا۔

ٹی ٹوئنٹی میں محمد نواز چھٹے نمبر پر آگئے ہیں، جبکہ صائم ایوب پانچ درجے ترقی کے ساتھ 49 ویں نمبر پر پہنچ گئے۔

تازہ ترین رینکنگ میں جنوبی افریقہ، بھارت، پاکستان اور افغانستان کے کئی کھلاڑیوں کی پوزیشنز میں نمایاں تبدیلیاں دیکھی گئیں۔