سیاست
اورکزئی میں 19 بھارتی سرپرست دہشت گرد ہلاک، لیفٹیننٹ کرنل جنید عارف، میجر طیاب سمیت 11 جوان شہید
اورکزئی ضلع میں 7 اور 8 اکتوبر 2025 کی درمیانی شب سیکیورٹی فورسز نے خفیہ معلومات پر مبنی ایک بڑی کارروائی میں 19 بھارتی سرپرست دہشت گردوں کو جہنم واصل کر دیا۔
آئی ایس پی آر کے مطابق کارروائی کے دوران شدید فائرنگ کے تبادلے میں لیفٹیننٹ کرنل جنید عارف (39)، میجر طیاب راحت (33) اور نو بہادر جوان جامِ شہادت نوش کر گئے جو اپنی ٹیموں کی قیادت کر رہے تھے۔
شہداء میں نائب صوبیدار اعظم گل (خیبر)، نائیک عادل حسین (کرّم)، نائیک گل امیر (ٹانک)، لانس نائیک شیر خان (مردان)، لانس نائیک طالش فراز (مانسہرہ)، لانس نائیک ارشاد حسین (کرّم)، سپاہی طفیل خان (مالاکند)، سپاہی عاقب علی (صوابی) اور سپاہی محمد زاہد (ٹانک) شامل ہیں۔
فورسز نے علاقے میں مزید خطرات کے خاتمے کے لیے سرچ آپریشن شروع کر دیا ہے۔
آئی ایس پی آر نے کہا کہ شہداء کی عظیم قربانیاں قوم کے عزم کو مزید مضبوط بنائیں گی اور دہشت گردی کے مکمل خاتمے تک یہ جدوجہد جاری رہے گی۔
وزیر اعظم شہباز شریف نے شہداء کو خراجِ عقیدت پیش کرتے ہوئے کہا کہ قوم اپنے بہادر سپوتوں کی قربانیاں کبھی نہیں بھولے گی۔ انہوں نے کہا کہ “بھارتی حمایت یافتہ دہشت گردوں کے ناپاک عزائم خاک میں مل جائیں گے۔”
وفاقی وزیر داخلہ محسن نقوی اور وزیر اعلیٰ خیبر پختونخوا علی امین گنڈاپور نے بھی شہداء کو خراجِ تحسین پیش کیا اور کہا کہ ان کی قربانیاں پاکستان کی سلامتی کی ضمانت ہیں۔