کھیل
گلیات ماؤنٹین ٹریل ریس2025, قدرتی بلندیوں پر دوڑ، قومی و بین الاقوامی رنرز کا زبردست مظاہرہ
پاکستان کے خوبصورت اور سرسبز پہاڑی علاقے گلیات میں مارگلہ ٹریل رنرز کے زیرِ اہتمام چوتھی گلیات ماؤنٹین ٹریل ریس کامیابی سے اختتام پذیر ہوئی۔ ریس میں 230 سے زائد قومی اور بین الاقوامی ایتھلیٹس نے حصہ لیا، جنہوں نے فطرت کے دلکش مناظر میں 60 کلومیٹر الٹرا اور 20 کلومیٹر ٹریل کی سخت ترین دوڑیں مکمل کیں۔
60 کلومیٹر کی ریس صبح 5 بجے تھنڈیانی سے شروع ہوئی، جس میں مجموعی بلندی کا فرق 2000 میٹر تھا۔ دوسری جانب 20 کلومیٹر کی ریس دوپہر 11 بجے نتھیا گلی کلب سے روانہ ہوئی، جس میں 500 میٹر کی چڑھائی اور سخت تکنیکی راستے شامل تھے۔
60 کلومیٹر کیٹیگری میں وقار احمد نے نہ صرف پہلی پوزیشن حاصل کی بلکہ گزشتہ سال کا ریکارڈ بھی 45 سیکنڈ کے فرق سے توڑ دیا۔ اُنہوں نے یہ فاصلہ 6 گھنٹے 39 منٹ اور 58 سیکنڈ میں طے کیا۔ خواتین میں کرسٹینا ویسر نے 8 گھنٹے 28 منٹ میں اپنی پوزیشن برقرار رکھتے ہوئے مسلسل دوسری بار فتح حاصل کی۔
20 کلومیٹر کی دوڑ میں اسرار محمد نے 1 گھنٹہ 43 منٹ میں شاندار فتح حاصل کی، جبکہ خواتین میں جیسی بہام نے 2 گھنٹے 43 منٹ میں کامیابی حاصل کی۔
ایونٹ کے انتظامات میں تعاون کرنے والے اداروں میں سی یو ایس ٹی یونیورسٹی (مرکزی اسپانسر)، نیسلے پروفیشنل (پانی اور توانائی فراہمی)، نظام واچ ہاؤس (فاتحین کے لیے انعامات)، فلو ایونٹس، اور ڈیجیٹل کوریج شامل تھے۔ درجنوں رضاکاروں اور معاونین نے بھی ایونٹ کی کامیابی میں بھرپور کردار ادا کیا۔
مارگلہ ٹریل رنرز کے بانی اور ریس ڈائریکٹر جاوید علی نے تمام شرکاء اور معاونین کا شکریہ ادا کیا اور کہا کہ پاکستان کے پہاڑی علاقے ایڈونچر اسپورٹس کے عالمی مرکز بننے کی مکمل صلاحیت رکھتے ہیں۔
اسرار خٹک، جو 20 کلومیٹر ریس میں دو مرتبہ فاتح رہ چکے ہیں، نے کہا: “یہ میرا تیسرا سال تھا، اور ہر سال ایونٹ کے انتظامات بہتر ہوتے جا رہے ہیں۔ اس بار کا تجربہ غیر معمولی اور یادگار رہا۔”
یہ دوڑ محض ایک مقابلہ نہیں بلکہ انسانی حوصلے، قدرتی خوبصورتی اور پاکستان کی مثبت تصویر کا جشن تھا۔ گلیات ماؤنٹین ٹریل ریس عالمی ایڈونچر سیاحت میں پاکستان کا روشن چہرہ بن کر ابھر رہی ہے۔