واٹس ایپ کی دھوکہ دہی کے خلاف بڑی کارروائی

واٹس ایپ نے صارفین کو دھوکہ دہی سے بچانے کے لیے نئی حفاظتی خصوصیات جاری کر دی ہیں۔ یہ قدم اس وقت اٹھایا گیا ہے جب پلیٹ فارم نے حالیہ مہینوں میں 68 لاکھ سے زائد فراڈ سے منسلک اکاؤنٹس بند کیے۔

نئی اپ ڈیٹ کے تحت گروپ چیٹس میں ‘سیفٹی اوورویو’ اسکرین ظاہر ہوگی، خاص طور پر جب کسی انجانے شخص کی جانب سے آپ کو گروپ میں شامل کیا جائے۔ اس فیچر میں یہ بتایا جائے گا کہ کیا شامل کرنے والا شخص آپ کے رابطے میں ہے اور کیا گروپ کے دیگر افراد آپ کے جاننے والے ہیں۔ اس دوران نوٹیفکیشنز خاموش رہیں گے تاکہ خطرناک مواد سے فوری رابطہ نہ ہو۔

ذاتی پیغامات میں بھی واٹس ایپ نے الرٹس متعارف کرائے ہیں جو اس وقت ظاہر ہوں گے جب کوئی نیا نمبر آپ سے بات چیت کا آغاز کرے۔ ان میں سیکیورٹی تجاویز اور بھیجنے والے کی معلومات شامل ہوں گی تاکہ صارف سوچ سمجھ کر جواب دے۔

واٹس ایپ نے صارفین کو خبردار کیا ہے کہ وہ نامعلوم پیغامات کا فوری جواب نہ دیں، مالی پیشکشوں کو شک کی نگاہ سے دیکھیں، اور جلد بازی میں کوئی قدم نہ اٹھائیں۔

کمپنی کا کہنا ہے کہ وہ AI، رپورٹنگ ٹولز اور عالمی پارٹنرشپس کے ذریعے پلیٹ فارم کو محفوظ بنانے پر مسلسل سرمایہ کاری کر رہی ہے۔