پی ٹی آئی 5 اگست کے احتجاج کی حکمت عملی بنانے میں ناکام، قیادت تقسیم کا شکار

تحریک انصاف نے اگرچہ 5 اگست کو “حقیقی آزادی” کے لیے ملک گیر احتجاج کی کال دے رکھی ہے، تاہم پارٹی قیادت اس احتجاج کے لیے اب تک واضح حکمت عملی ترتیب نہیں دے سکی۔

پارٹی ذرائع کے مطابق، پنجاب بھر کے تمام حلقوں میں احتجاج کی ہدایت تو جاری کر دی گئی ہے، لیکن لاہور میں احتجاج کی نوعیت اور مقام کے حوالے سے قیادت میں اختلافات شدت اختیار کر چکے ہیں۔

بعض سینئر رہنماؤں کا مؤقف ہے کہ لاہور کے تمام حلقوں کے کارکنوں کو اکٹھا کر کے ایک بڑی مشترکہ ریلی نکالی جائے، جب کہ پارٹی کی چیف آرگنائزر عالیہ حمزہ اور ان کے حامی اس بات پر زور دے رہے ہیں کہ ہر حلقے میں الگ الگ احتجاج کیا جائے تاکہ کارکنوں کو گرفتاریوں اور مقدمات سے بچایا جا سکے۔

تاحال لاہور میں احتجاج کہاں اور کیسے ہوگا، اس کا کوئی فیصلہ نہیں ہو سکا۔ قیادت صرف اس بات پر متفق دکھائی دیتی ہے کہ ہر رکن اسمبلی اور پارٹی ٹکٹ ہولڈر اپنے اپنے حلقے میں احتجاج کی قیادت کرے تاکہ کارکنوں کی حفاظت ممکن بنائی جا سکے۔

صورتحال کے باعث کارکن اور سپورٹرز پریشان ہیں اور پارٹی کی جانب سے کسی حتمی اعلان کے منتظر ہیں، جو یہ واضح کرے کہ 5 اگست کا احتجاج کس انداز میں اور کن مقامات پر منعقد ہوگا، خاص طور پر لاہور جیسے اہم شہر میں۔